O‘zbekistonda pandemiya davrida aholi va tadbirkorlarni qo‘llab-quvvatlash, narxlar barqarorligini ta’minlash maqsadida Soliq kodeksiga qo‘shimchalar kiritilmoqda. Bu haqda Oliy Majlis Qonunchilik palatasi deputati Rasul Kusherbayev o‘zining Telegram’dagi kanali orqali ma’lum qildi.
Yangi qo‘shimchaga asosan, 2020-yil 15-oktabrdan boshlab 2021-yil 1-yanvargacha muddatga:
- O‘zbekistonga shakar va shakar xomashyosini olib kirish, shuningdek, uni realizatsiya qilish aylanmalari;
- 2021-yil 1-iyulgacha muddatga O‘zbekistonga kartoshka, o‘simlik yog‘i, go‘sht (mol go‘shti, qo‘y go‘shti, tovuq go‘shti va boshqalar), hayvonlarni (qoramol va parranda) tirik holda va ularni so‘yishdan olingan mahsulotlarni olib kirish, shuningdek, ularni realizatsiya qilish aylanmalari qo‘shilgan qiymat solig‘idan (QQS) ozod qilish ko‘zda tutilgan.
Bu o‘z o‘rnida bozorlarda oshib borayotgan o‘simlik yog‘i, go‘sht va boshqa iste’mol mahsulotlarining narxi pasayib, barqarorlashishiga olib kelishi zarur”, — deb yozadi deputat.
Ta’kidlanishicha, qonun loyihasi deputatlar tomonidan qo‘llab-quvvatlangan. Loyihani shu hafta so‘ngida kutilayotgan Senat yalpi majlisiga kiritish rejalashtirilgan.
Ushbu qonun loyihasi deputatlar K.Ernazarov, M.Qurbonboyev, A.Umirov tashabbusi bilan ishlab chiqilgan.
Eslatib o‘tamiz, shu yilning iyul oyida Toshkent shahar davlat soliq boshqarmasi tomonidan qo‘shilgan qiymat solig‘i to‘lovchilarga xizmat ko‘rsatishda zamonaviy yondashuvlarni joriy etish va tezkor servis xizmatlari ko‘rsatish maqsadida “Maslahat markazi” tashkil etilgan edi.
Izoh (0)