Mas’ullar: Zangiotadagi COVID-19 shifoxonasida shu vaqtgacha elektr uzilishi bo‘lmagan, bo‘lishi ham mumkin emas

Zangiota tumanidagi COVID-19 ga chalingan bemorlarni davolashga ixtisoslashgan yuqumli kasalliklar shifoxonasida elektr ta’minoti uzilib qolgani va kislorodga ulangan bemorlar vafot etgani haqida xabarlar tarqalgan edi. Keyinchalik bu xabarlar rasman rad etildi. 14-oktabr kuni esa kasalxonadagi haqiqiy vaziyatni ko‘rsatish maqsadida OAV vakillari uchun press-tur tashkil etildi. Unda, jumladan, muassasa elektr energiyasi bilan qanday ta’minlanishi ko‘rsatib o‘tildi.

Qurilish vazirligi mas’uli Alisher Husanovning so‘zlariga ko‘ra, Zangiotadagi yuqumli kasalliklar shifoxonasida elektr ta’minotida uzilishlar bo‘lishi mumkin emas, chunki “u eng so‘nggi texnologiyalar bilan ta’minlangan”.

“Kasalxonaning elektr energiya ta’minoti uch tomonlama, ya’ni Zangiota elektr ta’minoti korxonasi tasarrufidagi nimstansiyasidan chiquvchi ‘Shifoxona-1, 2’, ‘Istiqbol’ va ‘TMZ’ nimstansiyalaridan chiquvchi liniyalar orqali ta’minlanadi. Bundan tashqari, mazkur kasalxonaning reanimatsiya bo‘limlari uchun maxsus UPS va dizel elektr manbai o‘rnatilgan bo‘lib, shifoxonaning elektr ta’minoti uchun 24 soat navbatchilik tashkil etilgan”, — dedi Husanov.

Shifoxonadagi har bir bo‘limga podstansiyalar yaqin qilib joylashtirilgan bo‘lib, elektr uzilishi holatlari bo‘lsa, qurilmalarni tezda almashtirish imkoniyati mavjud. Bunda barcha jarayon avtomatik tarzda amalga oshirilib, elektr uzilishiga yo‘l qo‘yilmaydi. Tibbiy qurilma va texnikalar ishlatilishida elektr kuchlanishi oshib ketsa, avtomatik UPS (akkumulyator) qurilmasi ishga tushadi va dizel-motor elektr manbaiga ulangunga qadar elektr yetkazib beradi.

Qayd etishlaricha, bunday UPS qurilmalari butun kasalxona bo‘ylab har bitta bo‘limga ikkitadan o‘rnatilgan.

Zangiota YuKShning birinchi kasalxonasi direktori Anvar Rustamovning so‘zlariga ko‘ra, 2,6 ming o‘ringa mo‘ljallangan shifoxona hozirda to‘liq quvvat bilan ishlayotgan bo‘lib, unda 1 850 nafar bemor davolanmoqda, ulardan 64 nafari reanimatsiyada.

“Bu yerga Toshkent shahri, viloyatidan va respublika bo‘yicha bemorlar keladi. Kasalxonamiz bugungi kun talabiga javob beradigan eng zamonaviy muassasa hisoblanadi. Qurilganiga 4 oy bo‘lishiga qaramay, 14 mingdan ortiq bemor murojaat qilgan va ularning 12 mingdan ortig‘i davolangan. 9—10-oktabr kunlari ijtimoiy tarmoqlarda kasalxonamizda elektr o‘chib qolishi natijasida ko‘plab bemorlar vafot etganligi to‘g‘risida asossiz xabarlar tarqaldi. Men mana shu kasalxonaning direktori sifatida, 24 soat shu yerda bo‘lgan shaxs sifatida aytishim mumkinki, nafaqat elektr, balki suv va gazdan ham uzilish bo‘lgani yo‘q”, – dedi Zangiota birinchi maxsus shifoxonasi direktori Anvar Rustamov.

Shuningdek, reanimatsiya bo‘limi xodimi Surayyo Qoraqulova “Daryo” muxbiriga bergan intervyusida bunday vaziyat bo‘lmaganini, agarda bo‘lsa bu katta yo‘qotishlarga olib kelishini aytib o‘tdi.