Sirdaryoda M-34 avtomobil yo‘lidagi ko‘prikning ta’mirtalab bo‘lgani sababli yuk mashinalarining ko‘prik ustidan o‘tishi taqiqlandi
Sirdaryo viloyati Sirdaryo tumani hududidan o‘tgan xalqaro ahamiyatdagi M-34 Toshkent—Dushanbe avtomobil yo‘lining 90-kilometridagi “Sho‘ro‘zak” kollektori ustida joylashgan temir-beton ko‘prikning yuk ko‘tarish qobiliyati pasayib, ta’mirtalab holga kelib qolgani uchun Sirdaryo viloyatiga kiruvchi va chiquvchi yuk avtotransport vositalarining ushbu ko‘prik orqali harakati vaqtincha taqiqlandi. Bu haqda Ichki ishlar vazirligi Yo‘l harakati xavfsizligi bosh boshqarmasi xabar berdi.
Ma’lum qilinishicha, yuk mashinalarining ko‘prik ustidan o‘tishi taqiqlangani sababli Toshkent—Jizzax yo‘nalishi bo‘yicha Sirdaryo viloyat hududiga kirib kelayotgan yuk mashinalarining qatnovi xalqaro ahamiyatdagi M-34 avtomobil yo‘lining 70—83-kilometri, mahalliy ahamiyatdagi 4K-643 Sirdaryo shahri—Malik qishlog‘i—Baxt shahri avtomobil yo‘lining 0—5-kilometri, 4K-642 Sindorobod qishlog‘i—Safar ota qishlog‘i—Malik qishlog‘i—Baxt shahri avtomobil yo‘lining 9—17-kilometri hamda M-34 avtomobil yo‘lining 94—104-kilometri orqali tashkil qilingan.
Shuningdek, yuk mashinalari Jizzax—Toshkent yo‘nalishi bo‘yicha A-373 yo‘lidan harakatlanganda M-39 avtoyo‘li—Guliston—Bo‘ka—Angren—Qo‘qon va Andijon orqali—O‘sh avtomobil yo‘lining 38—56-kilometri, davlat ahamiyatidagi 4R-25 yo‘li orqali harakatlangan A-373 avtoyo‘li—Sayhun qishlog‘i—Baxt shahri—Qozog‘iston Respublikasi chegarasi avtomobil yo‘lining 24—33-kilometri, mahalliy ahamiyatdagi 4K-657a “Sayhunobod TYXPDFKga” avtomobil yo‘lining 0—1-kilometri, 4K-657a “Sirdaryo DFXUga” avtomobil yo‘lining 0—10-kilometri uchun davlat ahamiyatidagi 4R-26 Sirdaryo shahri—Dehqonobod qishlog‘i—Qiyot qishlog‘i—Bekobod shahri avtomobil yo‘lining 8—18-kilometri hamda 4R-26a M-39 avtoyo‘liga (871 km) shoxobcha avtomobil yo‘lining 0—12-kilometri o‘z manziliga tomon harakatlanishi mumkin.
