Farg‘ona vodiysidan Toshkent tomon harakatlanib kelayotgan ikki avtomobil Qamchiq dovonida yo‘l chetidagi xandaqqa tushib ketdi, deya xabar bermoqda Favqulodda vaziyatlar vazirligi.
Foto: FVV
Qayd etilishicha, 5-oktabr kuni soat 19:45 da Toshkent–O‘sh xalqaro avtomobil yo‘lining 251-kilometrida mashina yukxonasiga oyna ortilgan Isuzu yo‘l chetidagi xandaqqa tushib ketdi. Bu hodisa Toshkent tomon yo‘l olgan haydovchining mashina boshqaruvini yo‘qotishi tufayli sodir bo‘lgan.
Voqeadan 3 daqiqa o‘tib Mercedes-Benz Sprinter furgoni xuddi shu sababga ko‘ra, aynan o‘sha xandaqqa tushib ketdi.
Qisqa vaqt ichida “Qamchiq” maxsus qidiruv, yong‘in-qutqaruv boshqarmasi xodimlari voqea joyiga yetib kelgan va maxsus texnika yordamida har ikkala mashinani xavfsiz hududga olib chiqqan.
Har ikkala haydovchiga ham YTHda tan jarohati yetmagani ma’lum qilingan.
Avvalroq Qamchiq dovonida Mercedes-Benz Sprinter furgoni yonib ketgani xabar qilingandi.
