Toshkent viloyati Zangiota tumanidagi xonadonda 2020-yilning 13-sentabr kuni juda ko‘p miqdorda o‘g‘irlik sodir etgan Qashqadaryo viloyati Mirishkor tumanida yashovchi fuqaro qo‘lga olindi. Bu haqda Tergov departamenti xabar berdi.
Ma’lum qilinishicha, 2020-yilning 13-sentabr kuni soat taxminan 17:30 dan 21:00 gacha bo‘lgan vaqt oralig‘ida noma’lum shaxs Zangiota tumani “Bobur” mahallasida yashovchi 31 yoshli M.Yu.ning xonadoniga devordan oshib kirgan.
Noma’lum shaxs uyning yotoqxonasida turgan javon ichidagi kiyimlar orasida bo‘lgan jami 5300 dollar naqd pulni, javon ustidagi uch dona RedMi rusumli telefonni 1,8 million so‘m miqdoridagi naqd pul hamda javon tortmasidan umumiy bahosi 20 ming dollar qiymatiga teng bo‘lgan 16 dona turli xildagi ayollar taqinchoqlarini o‘g‘irlab, hodisa joyidan yashiringan.
Mazkur holat yuzasidan noma’lum shaxsga nisbatan Zangiota tumani IIB huzuridagi Tergov bo‘limi tomonidan O‘zbekiston Respublikasi Jinoyat kodeksining 169-moddasi 4-qismi “a” bandi (juda ko‘p miqdorda sodir etilgan o‘g‘irlik) bilan jinoyat ishi qo‘zg‘atilgan.
Olib borilgan tergov-tezkor harakatlari davomida mazkur jinoyatni Qashqadaryo viloyati Mirishkor tumanida yashovchi 33 yoshli S.B. sodir etganligi aniqlangan. Jinoyat ishi bo‘yicha S.B. gumon qilinuvchi tariqasida jalb qilinib, protsessual tartibda ushlangan. Hozirda tergov harakatlari davom ettirilmoqda.
Ma’lumot uchun, mazkur jinoyatni sodir etganlik uchun O‘zbekiston Respublikasi Jinoyat kodeksida 8 yildan 15 yilgacha ozodlikdan mahrum qilish jazosi nazarda tutilgan.
Mavzuga doir:
Izoh (0)