Тошкент вилояти Зангиота туманидаги хонадонда 2020 йилнинг 13 сентябрь куни жуда кўп миқдорда ўғирлик содир этган Қашқадарё вилояти Миришкор туманида яшовчи фуқаро қўлга олинди. Бу ҳақда Тергов департаменти хабар берди.
Маълум қилинишича, 2020 йилнинг 13 сентябрь куни соат тахминан 17:30 дан 21:00 гача бўлган вақт оралиғида номаълум шахс Зангиота тумани «Бобур» маҳалласида яшовчи 31 ёшли М.Ю.нинг хонадонига девордан ошиб кирган.
Номаълум шахс уйнинг ётоқхонасида турган жавон ичидаги кийимлар орасида бўлган жами 5300 доллар нақд пулни, жавон устидаги уч дона RedMi русумли телефонни 1,8 миллион сўм миқдоридаги нақд пул ҳамда жавон тортмасидан умумий баҳоси 20 минг доллар қийматига тенг бўлган 16 дона турли хилдаги аёллар тақинчоқларини ўғирлаб, ҳодиса жойидан яширинган.
Мазкур ҳолат юзасидан номаълум шахсга нисбатан Зангиота тумани ИИБ ҳузуридаги Тергов бўлими томонидан Ўзбекистон Республикаси Жиноят кодексининг 169-моддаси 4-қисми «а» банди (жуда кўп миқдорда содир этилган ўғирлик) билан жиноят иши қўзғатилган.
Олиб борилган тергов-тезкор ҳаракатлари давомида мазкур жиноятни Қашқадарё вилояти Миришкор туманида яшовчи 33 ёшли С.Б. содир этганлиги аниқланган. Жиноят иши бўйича С.Б. гумон қилинувчи тариқасида жалб қилиниб, процессуал тартибда ушланган. Ҳозирда тергов ҳаракатлари давом эттирилмоқда.
Маълумот учун, мазкур жиноятни содир этганлик учун Ўзбекистон Республикаси Жиноят кодексида 8 йилдан 15 йилгача озодликдан маҳрум қилиш жазоси назарда тутилган.
Изоҳ (0)