Prezident Shavkat Mirziyoyev “‘Mard o‘g‘lon’ davlat mukofoti bilan taqdirlash to‘g‘risida”gi qarorni va “‘Mehr-saxovat’ ko‘krak nishoni bilan mukofotlash to‘g‘risida”gi farmonni imzoladi, deb xabar beradi O‘zA.
O‘zbekiston Prezidenti huzuridagi Davlat mukofotlari va geraldika bo‘yicha komissiyaning Qoraqalpog‘iston Respublikasi, viloyatlar va Toshkent shahrining iqtidorli yigitlarini fan, ta’lim, tibbiyot, madaniyat, adabiyot, san’at, sport, ishlab chiqarish, harbiy xizmat sohalari va huquqni muhofaza qilish organlaridagi faoliyatida erishgan alohida yutuqlari uchun “Mard o‘g‘lon” davlat mukofoti bilan taqdirlash to‘g‘risidagi takliflari ma’qullandi.
“Mard o‘g‘lon” davlat mukofoti bilan taqdirlanganlarga sovrindorlik diplomlari va ko‘krak nishonlari tantanali vaziyatda topshiriladi. Moliya vazirligi “Mard o‘g‘lon” davlat mukofoti sovrindorlarining har biriga bazaviy hisoblash miqdorining 50 baravari miqdorida pul mukofoti berilishini ta’minlaydi.
Shuningdek, sog‘liqni saqlash sohasining jonkuyar vakillari, saxovatli tadbirkorlar, davlat va jamoat tashkilotlarining fidoyi xodimlari hamda boshqa tashabbuskor va faol fuqarolar “Mehr-saxovat” ko‘krak nishoni bilan mukofotlandi.
Vazirlar Mahkamasi “Mehr-saxovat” ko‘krak nishoni bilan taqdirlash bo‘yicha vazirliklar, idoralar, xo‘jalik boshqaruvi organlari, jamoat birlashmalari va boshqa respublika tashkilotlari hamda Qoraqalpog‘iston Respublikasi Jo‘qorg‘i Kengesi, viloyatlar va Toshkent shahar hokimliklari tomonidan taqdim etilgan ro‘yxatlarni ko‘rib chiqadi va tasdiqlaydi.
“Mard o‘g‘lon” davlat mukofoti bilan taqdirlanganlar ro‘yxati:
- Otabek Rahimboyev — Qoraqalpoq davlat universitetining 3-bosqich talabasi (Qoraqalpog‘iston Respublikasi);
- Pamir Serjanov — Nukus shahridagi “Oralbay Nukus” oilaviy korxonasi rahbari (Qoraqalpog‘iston Respublikasi);
- Mirzoxid Abduxalilov — Andijon mashinasozlik institutining 4-bosqich talabasi (Andijon viloyati);
- Alisher Komilov — Mudofaa vazirligining Axborot-kommunikatsiya texnologiyalari va aloqa harbiy instituti ilmiy xodimi (Andijon viloyati);
- Feruz Jo‘rayev — “Hunarmand” uyushmasining Buxoro viloyati boshqarmasi a’zosi (Buxoro viloyati);
- Jahongir Norboyev — Peshku tumanidagi 18-umumiy o‘rta ta’lim maktabining 11-sinf o‘quvchisi (Buxoro viloyati);
- Bekzod Tursunov — Toshkent arxitektura-qurilish instituti tayanch doktoranti (Jizzax viloyati);
- Ravshan Xalilov — Toshkent davlat agrar universitetining 1-bosqich talabasi (Jizzax viloyati);
- Farrux Qodirov — Toshkent axborot texnologiyalari universitetining Qarshi filiali 1-bosqich magistranti (Qashqadaryo viloyati);
- Muhriddin Ochilov — Mudofaa vazirligining harbiy qism guruh mutaxassisi (Qashqadaryo viloyati);
- Suhrob Haydarov — Navoiy shahridagi 4-ixtisoslashtirilgan umumiy o‘rta ta’lim maktabining 10-sinf o‘quvchisi (Navoiy viloyati);
- Husan Egamov — Toshkent tibbiyot akademiyasining 1-bosqich talabasi (Navoiy viloyati);
- Farrux Abduxalilov — Yangiqo‘rg‘on tumani ko‘p tarmoqli markaziy poliklinikasi vrach-epidemiologi (Namangan viloyati);
- Sardorjon Saloydinov — Toshkent davlat texnika universitetining 1-bosqich magistranti (Namangan viloyati);
- Hasan Nurullayev — Narpay tumanidagi 64-umumiy o‘rta ta’lim maktabining 8-sinf o‘quvchisi (Samarqand viloyati);
- Rasul Sharipov — Davlat xavfsizlik xizmatining chegara qo‘shinlari vzvod komandiri (Samarqand viloyati);
- Jasur Usmonov — Milliy gvardiyaning Harbiy-texnik instituti tayanch doktoranti (Sirdaryo viloyati);
- Azizjon Eshbekov — Mirzaobod tumanidagi ixtisoslashtirilgan umumiy o‘rta ta’lim maktab-internatining 11-sinf o‘quvchisi (Sirdaryo viloyati);
- Sharafuddin Lutfillayev — Toshkent davlat iqtisodiyot universitetining 3-bosqich talabasi (Surxondaryo viloyati);
- Olim Saparov — “Yoshlar – kelajagimiz” jamg‘armasining Termiz shahar filiali rahbari (Surxondaryo viloyati);
- Boburjon Yo‘ldashboyev — Parkent tumanidagi Modern education intellektni rivojlantirish markazi direktori (Toshkent viloyati);
- Sarvar Shoyunusov — Toshkent pediatriya tibbiyot institutining 4-bosqich talabasi (Toshkent viloyati);
- Asilbek Ahadjonov — O‘zbekiston davlat konservatoriyasining 2-bosqich talabasi (Farg‘ona viloyati);
- Jasurbek Imomov — O‘zbekiston Milliy universitetining 1-bosqich talabasi (Farg‘ona viloyati);
- Rahmatjon Bobojonov — Toshkent shahridagi “Kitob dunyosi” gazetasining o‘zbek adabiyoti bo‘limi muharriri (Xorazm viloyati);
- Nodirbek Yoqubboyev — O‘zbekiston Milliy universitetining 1-bosqich talabasi (Xorazm viloyati);
- Muhiddin Mamajonov — Toshkent shahar Ichki ishlar bosh boshqarmasining tezkor vazifalarni bajaruvchi safarbar otryadi katta mutaxassis-o‘qchisi (Toshkent shahri);
- Vladislav Mustafin — Suzish bo‘yicha O‘zbekiston milliy terma jamoasi a’zosi (Toshkent shahri).
Izoh (0)