“Paxtakor” bosh murabbiyi Shota Arveladze Coca-Cola Superliga 11-turi doirasida “Nasaf”ga qarshi kechgan o‘yindan (4:1) keyin o‘z fikrlari bilan o‘rtoqlashdi.
Birinchi navbatda aytishim kerak, “Nasaf”ga qarshi o‘ynash doim yoqimli. Sababi raqib hujumkor o‘ynaydi, qobiliyatli yosh futbolchilar to‘p tepadi. Murabbiy doim taktik tomonlama qiyinchiliklar tug‘dirishga harakat qiladi. Birinchi bo‘limda “Nasaf” klassik uslubda hujumchi ortidagi sxema bilan harakat qildi, ikkinchi bo‘limda esa sxema o‘zgardi, 5-2-3 ga o‘tdi. Ammo biz ham bunga tayyor edik va taktik tomonlama aqlli qarshilik qildik.Afsuski, “Bunyodkor”dagi maydon holati baribir yaxshiroq o‘ynashga imkoniyat bermayapti. Bundan keyin tiklanish ham qiyin bo‘ladi. O‘ylaymanki, mamlakatda stadionlar holatlari yaxshilanib boraveradi. Sababi hujumkor o‘yin namoyish etadigan “Bunyodkor” uchun ham, O‘zbekiston milliy terma jamoasi uchun ham sifatli maydon kerak.
Javohir Sidiqov professional futbolchi. Unga doim ishonganman. Abdullayevga ham, Komilovga ham ishonamiz. Sidiqov deyarli bir yil davomida jarohatidan davolandi. Qo‘shimchasiga operatsiya qilingan joyida ikki bor infeksiya paydo bo‘ldi. Pandemiya vaqtidagi vaqt unga qo‘shimcha imkoniyat bo‘ldi. Mashg‘ulotlar vaqtida juda yaxshi ishlaydi.
Umid qilamanki, Chempionlar Ligasiga yaxshi formada yetib boramiz. Yigitlarimiz uch hafta davomida davolanganini unutmang. Kimdir antibiotiklar bilan, kimdir ularsiz. Kimdadir yo‘tal bo‘ldi, kimdadir boshqa narsa. Ruhiy tomonlama ham qiyinchiliklar bo‘ldi. Yigitlar yana bir bor xarakter namoyish etdi. Masalan, Cheran penaltini Sergeyevga berdi. Bu o‘zi qo‘rqqanidan emas, shunchaki Sergeyevni qo‘llab-quvvatlash uchun berdi. Buni murabbiylar yoki boshqa odam aytgani yo‘q. Bu jamoa uchun muhim jihatlardan biri.
Shota Arveladze, “Paxtakor” bosh murabbiyi
“Paxtakor” ushbu g‘alabadan keyin ochkolarini 28 taga yetkazib olgan holda peshqadamlikni saqlab qoldi. Jamoa keyingi turda “Lokomotiv” bilan o‘ynaydi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)