Markaziy bank 2020-yil 2-chorak yakunlari bo‘yicha uy xo‘jaliklarining daromadlari va xarajatlari, ularning tarkibi, koronavirus pandemiyasi va inflyatsiyaning turmush darajasi ta’siriga oid axborot-tahliliy ma’lumotini taqdim etdi.
Tahlillar Uy xo‘jaliklari daromadlari va xarajatlari bo‘yicha so‘rov (UDXS) natijalari hamda hududlar kesimidagi iste’mol narxlari indeksi (INI) ma’lumotlari asosida amalga oshirilgan.
So‘rov natijalari bo‘yicha oilaviy daromadlar tarkibi va undagi o‘zgarishlar guruhlarga bo‘lib tahlil qilinganda so‘rovnomada ishtirok etgan respondentlarning asosiy qismi – 35 foizi o‘rtacha 2-4 million so‘m oylik daromadga ega ekanligi ma’lum bo‘lgan. Ushbu ko‘rsatkich 2020-yilning 1-choragidagi so‘rovda 38,7 foizni tashkil etgan edi.
Respondentlarning 21 foizida oilaviy o‘rtacha oylik daromad 2 million so‘mgacha bo‘lib, ushbu guruh ulushi 1-chorakka (8 foiz) nisbatan sezilarli darajada o‘sgan. 2-chorakdagi so‘rovda mazkur kam daromadli guruh ulushining sezilarli o‘sishi karantin cheklovlari ta’sirida norasmiy sektor va xizmatlar sohasida ish joylarining qisqarishi hisobiga aholi daromadlarining kamayganligi bilan izohlanadi.
Shuningdek, so‘rov ma’lumotlari asosida uy xo‘jaliklarining ayrim oziq-ovqat mahsulotlariga o‘rtacha oylik xarajatlari tahlil qilingan.
Bunda 1-chorakda barcha daromad guruhidagi aholining asosiy oziq-ovqat mahsulotlari bo‘yicha xarajatlari 1-chorakka nisbatan sezilarli darajada qisqargan. Mazkur holat koronavirus pandemiyasi davrida aholi daromadlarining kamayishi hamda xarajatlarning optimallashtirilishi bilan izohlangan.
Bundan tashqari, uy xo‘jaliklarining go‘sht mahsulotlari uchun o‘rtacha oylik xarajatlari 2-chorakda oldingi chorakka nisbatan sezilarli darajada qisqargan. Xususan, oylik daromadi 2 million so‘mgacha bo‘lgan aholining oylik o‘rtacha go‘sht mahsulotlari xaridi 1-chorakka nisbatan 39,5 foizga yoki 107 ming so‘mga kamayib 164 ming so‘mni tashkil etgan.
Mazkur farq oylik daromadi 2-4 million so‘m bo‘lgan uy xo‘jaliklarida 161 ming so‘mga, daromadi 10 million so‘mdan yuqori bo‘lgan uy xo‘jaliklarida 528 ming so‘mni tashkil etgan.
Izoh (0)