Cosmopolitan moda ixlosmandlarini ilhomlantiradigan bir nechta Osiyo filmlarini tomosha qilishni taklif etadi. Ular Hindiston, Xitoy va Koreyaning tarixiy filmlaridir.
Tarixiy filmlarning eng qiziqarli tomoni shundaki, film yoki serial ma’lum davr ruhi bilan to‘yingan bo‘ladi. Garchi film mavzusi yoki g‘oyasi unchalar ta’sirli bo‘lmasa-da, tarixiy ko‘rinish, liboslar, rassomning ishi tomoshabinga ko‘proq ma’lumotlar berishi shubhasiz. Quyida tavsiya etilgan Osiyoning uchta tarixiy filmi yorqinligi va haqqoniyligi bilan hech kimni befarq qoldirmaydi.
Hindiston: “Jodha va Akbar”
(Autosh Govariker, 2008)
Mo‘g‘il imperiyasining hukmdori Akbar va uning rafiqasi Jodha haqidagi epik tarixiy film. Siyosiy ittifoqning qanday qilib haqiqiy sevgiga aylangani haqida ajoyib tarixiy hikoya. Bollivud filmi bo‘lsa-da, fillar bilan raqs yo‘q. Lekin fillar, qo‘shiqlar va raqs ham bor, faqat ular alohida sahnada jonlanadi.
Shuningdek, aqlbovar qilmas liboslar va jonli tasvir filmning asosiy qismiga aylangan. Bollivudning eng mashhur “Devdas” filmining libos ustasi Nita Lulla ushbu kartinada ham liboslar bilan ishladi. Ayshvariya Ray ijro etgan bosh qahramon betakror qirmizi, olovrang, yashil hamda sariq rangdagi sarilar va ajoyib hind zargarlik buyumlarida namoyon bo‘ladi. Hatto podshohning tillarang, kashtalar va marvaridlar bilan boyitilgan libosi malika Jodhanikidan ortda qolmaydi. Ular birgalikda chindan ham qirollik oilasiga o‘xshagan – haqiqiy qirol va qirolicha.
Xitoy: “Oltin gulning qarg‘ishi”
(Chjan Imou, 2006)
Imperator oilasi haqida hikoya qiluvchi ushbu film aslida oltin va zargarlik buyumlari ortiga insoniy munosabatlarning naqadar xunuk tabiati yashiringanini ko‘rsatib beradi.
Tasvir ko‘lami va miqyosi hayratlanarli darajada, albatta. Ommaviy sahna ko‘rinishi hamda ajoyib dekoratsiyalar bilan birga, go‘zal liboslarga e’tibor qaratmaslik mumkin emas. Sababi qahramonlar libosiga juda ko‘p vaqt va bir qancha dizaynerlar mehnati singgan. Masalan, qirol va qirolichaning liboslari ustida naqd ikki oy davomida 40 nafar dizayneri ish olib borgan.
Koreya: “Go‘zallik”
(Pak Xin Shik, 2016)
Ushbu film ijodkor ayollarning raqobati hamda 40-yillarda zabt etilgan Koreyaning iste’dodli kompozitori haqida. Tanqidchilar tomonidan o‘sha davrdagi Kyonson ( hozirgi Seul)ning hayratlanarli darajada qayta tiklangan muhiti alohida ta’kidlangan. Musiqa, dekoratsiya, liboslar – bularning hammasi tarixga kirishga yordam beradi.
Filmda tanlangan liboslar chindan ham rang-barangdir. Ularda g‘arbiy Yevropa va yapon istilosining natijasi yaqqol namoyon bo‘lgan. An’anaviy va katta gullar tasviri tushirilgan yoki qalin matolarga tikilgan kashtali liboslar tarixiy davr ruhini paydo qiladi. Film liboslari ustida mehnat qilgan Cho San Gen bundan avval rejissor Pak Chxan Ukaning “Xizmatkor” hamda boshqa filmlarga dizaynerlik qilgan.
Izoh (0)