Ёрқин либослари билан илҳомлантирувчи Ҳиндистон, Хитой ва Жанубий Корея фильмлари (фото)

Cosmopolitan мода ихлосмандларини илҳомлантирадиган бир нечта Осиё фильмларини томоша қилишни таклиф этади. Улар Ҳиндистон, Хитой ва Кореянинг тарихий фильмларидир.

Тарихий фильмларнинг энг қизиқарли томони шундаки, фильм ёки сериал маълум давр руҳи билан тўйинган бўлади. Гарчи фильм мавзуси ёки ғояси унчалар таъсирли бўлмаса-да, тарихий кўриниш, либослар, рассомнинг иши томошабинга кўпроқ маълумотлар бериши шубҳасиз. Қуйида тавсия этилган Осиёнинг учта тарихий фильми ёрқинлиги ва ҳаққонийлиги билан ҳеч кимни бефарқ қолдирмайди.

Ҳиндистон: «Жодҳа ва Акбар»

(Аутош Говарикер, 2008)

Мўғил империясининг ҳукмдори Акбар ва унинг рафиқаси Жодҳа ҳақидаги эпик тарихий фильм. Сиёсий иттифоқнинг қандай қилиб ҳақиқий севгига айлангани ҳақида ажойиб тарихий ҳикоя. Болливуд фильми бўлса-да, филлар билан рақс йўқ. Лекин филлар, қўшиқлар ва рақс ҳам бор, фақат улар алоҳида саҳнада жонланади.

Шунингдек, ақл бовар қилмас либослар ва жонли тасвир фильмнинг асосий қисмига айланган. Болливуднинг энг машҳур «Девдас» фильмининг либос устаси Нита Лулла ушбу картинада ҳам либослар билан ишлади. Айшвария Рай ижро этган бош қаҳрамон бетакрор қирмизи, оловранг, яшил ҳамда сариқ рангдаги сарилар ва ажойиб ҳинд заргарлик буюмларида намоён бўлади. Ҳатто подшоҳнинг тилларанг, кашталар ва марваридлар билан бойитилган либоси малика Жодҳаникидан ортда қолмайди. Улар биргаликда чиндан ҳам қироллик оиласига ўхшаган – ҳақиқий қирол ва қиролича.

Хитой: «Олтин гулнинг қарғиши»

(Чжан Имоу, 2006)

Император оиласи ҳақида ҳикоя қилувчи ушбу фильм аслида олтин ва заргарлик буюмлари ортига инсоний муносабатларнинг нақадар хунук табиати яширинганини кўрсатиб беради.

Тасвир кўлами ва миқёси ҳайратланарли даражада, албатта. Оммавий саҳна кўриниши ҳамда ажойиб декорациялар билан бирга, гўзал либосларга эътибор қаратмаслик мумкин эмас. Сабаби қаҳрамонлар либосига жуда кўп вақт ва бир қанча дизайнерлар меҳнати сингган. Масалан, қирол ва қироличанинг либослари устида нақд икки ой давомида 40 нафар дизайнери иш олиб борган.

Корея: «Гўзаллик»

(Пак Хин Шик, 2016)

Ушбу фильм ижодкор аёлларнинг рақобати  ҳамда 40 йилларда забт этилган Кореянинг истеъдодли композитори ҳақида. Танқидчилар томонидан ўша даврдаги Кёнсон ( ҳозирги Сеул)нинг ҳайратланарли даражада қайта тикланган муҳити алоҳида таъкидланган. Мусиқа, декорация, либослар – буларнинг ҳаммаси тарихга киришга ёрдам беради.

Фильмда танланган либослар чиндан ҳам ранг-барангдир. Уларда ғарбий Европа ва япон истилосининг натижаси яққол намоён бўлган. Анъанавий ва катта гуллар тасвири туширилган ёки қалин матоларга тикилган каштали либослар тарихий давр руҳини пайдо қилади. Фильм либослари устида меҳнат қилган Чо Сан Ген бундан аввал режиссёр Пак Чхан Уканинг «Хизматкор» ҳамда  бошқа фильмларга дизайнерлик қилган.