15-avgustdan e’tiboran O‘zbekistonda karantin choralari bosqichma-bosqich bekor qilinishi e’lon qilingan. 17-avgustdan mamlakatdagi barcha masjidlarda besh vaqt namozni jamoat bilan ado etish yo‘lga qo‘yiladi. O‘zbekiston musulmonlari idorasining Toshkent shahar vakilligi masjidlarga kirish tartibi, bunda sanitariya-gigiyena qoidalariga rioya qilish, sunnat va farz namozlarda safda turish bo‘yicha tartib haqida videoqo‘llanma ishlab chiqdi.
Unda barcha namozxonlar masjidlarda joriy etilgan sanitariya-epidemiologik qoidalar bayon qilingan.
Asosiy qoidalar quyidagilardan iborat:
- masjidlarga kirish yo‘lagi birlamchi dezinfeksiyalash vositalari, pirometrlar (kontaktsiz harorat o‘lchagich) bilan ta’minlanadi;
- har bir fuqaro masjid ichida tibbiy niqobda bo‘lishi, hududga kirishda qo‘llariga antiseptik dezinfeksiyalash vositasini sepishi yoki sovunlab yuvib olishi kerak;
- masjidga tashrif buyurgan har bir shaxsning kasallik alomatlarini tekshirish (harorat o‘lchash va tashqi alomatlar), tana harorati 37 daraja va undan yuqori bo‘lgan holatda fuqarolarni alohidalash va 103 raqami orqali tez tibbiy yordamga xabar berish zarur;
- ibodat vaqtida ijtimoiy masofalanishni saqlash, fuqarolar orasidagi masofani 1,5 metr etib belgilash (maxsus chiziqlar yordamida kataklarga ajratgan holda) talab etiladi;
- har bir masjidning kirish qismiga kasallikdan saqlanish, hududda karantin talablariga qat’iy amal qilish, xususan, 65 yoshdan katta fuqarolarni masjidlarga vaqtincha tashrif buyurmay turishi tavsiya etilishi to‘g‘risidagi axborot lavhalari o‘rnatiladi;
- masjid ma’muriyati tomonida ish faoliyatni karantin davrida tashkil etish bo‘yicha tegishli buyruq va ichki tartiblarni ishlab chiqish (bunda yoshi 65 yoshdan ulug‘ fuqarolarni vaqtincha tashrif buyurmay turishini tavsiya etish) yo‘lga qo‘yiladi;
- masjidlarda juma namozi vaqtincha ado etilmaydi;
- hududiy sanitariya-epidemiologiya xizmati xodimlari tomonidan masjidlarning barcha xodimlari bilan tushuntirish ishlari tashkil etiladi;
- ushbu xizmat tomonidan belgilangan muddatda (har 3 kunda yoki haftada bir marta) masjidlardagi sanitariya-epidemiologik holatni o‘rganiladi va bu borada tavsiyalar beriladi;
- masjidlar binolari va hududini har kuni dezinfeksiya qilish, xonalarni shamollatish ishlari bajariladi;
- masjidga kirish va chiqish joylarida aholining to‘planishiga qat’iy yo‘l qo‘ymaslik ta’minlanadi;
- tahoratxonadan zarur sharoitlar yaratiladi (bir martalik sochiq-salfetka, antiseptik vositalar, suyuq sovunlar bilan ta’minlanadi, qisqa muddatlarda dezinfeksiya qilinadi) ijtimoiy masofalanishni saqlagan holda foydalaniladi.
Izoh (0)