Surxondaryoning Sariosiyo tumanida o‘qituvchilarning 355,3 million so‘mlik mablag‘larini o‘zlashtirgan hisobchiga jinoiy ish qo‘zg‘atildi. Bu haqda “Daryo”ga Bosh prokuratura matbuot xizmati xabar berdi.
Ma’lum bo‘lishicha, tuman Xalq ta’limi bo‘limi hisobchisi X.K. tumandagi 27-sonli maktabda muqaddam ishlab ketgan fuqaro M.Q., N.T., O.E. va haqiqatan ishlamagan Sh.Q.ning nomiga bank plastik kartasini rasmiylashtirib, 2016—2020-yillar davomida jami 355,3 million so‘m budjet mablag‘larini talon-toroj qilgan.
Holat yuzasidan X.K.ga nisbatan Jinoyat kodeksining 167-moddasi 3-qismi “a” bandi (juda ko‘p miqdorda rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Andijonda uy-joy kommunal xizmat ko‘rsatish boshqarmasi mansabdorlari ishlamagan xodimlarga pul yozib 239 million so‘m o‘zlashtirgani haqida xabar berilgan edi.
Izoh (0)