So‘nggi uch oy ichida koronavirus pandemiyasi tufayli qiyin ahvolda qolgan barcha o‘zbekistonliklar AQSh va Kanadadan evakuatsiya qilindi. Bu haqda “Kun.uz” O‘zbekistonning Vashingtondagi elchixonasi va mamlakatning Nyu-Yorkdagi bosh konsulligiga tayanib xabar bermoqda.

Foto: “Kun.uz”

Ma’lumotlarga ko‘ra, kecha Toshkent vaqti bilan soat 22:00 (mahalliy vaqt bilan 13:00)da bortida O‘zbekiston fuqarolari bo‘lgan Uzbekistan Airways’ning charter reysi Nyu-Yorkdan parvoz qilgan.

Qayd etilishicha, fuqarolarni O‘zbekistonga charter reyslarida bosqichma-bosqich olib kelish bo‘yicha ko‘rilgan choralar natijasida so‘nggi uch oy ichida koronavirus pandemiyasi tufayli qiyin ahvolda qolgan barcha o‘zbekistonliklar AQSh va Kanadadan evakuatsiya qilingan. Navbatdagi maxsus reysda 3 nafar yangi tug‘ilgan chaqaloq bilan 174 nafar fuqaro jo‘nab ketdi. Shu bilan birga, 778 nafar o‘zbekistonlik parvozdan bosh tortdi va uni dunyodagi epidemiologik vaziyat yaxshilangunga qadar kechiktirdi.

Iyun—avgust oylarida Amerika qit’asidan jami 1200 kishi evakuatsiya qilingan, ularning 26 nafari chet el fuqarolari hisoblanadi.

Ta’kidlanishicha, O‘zbekiston fuqarolari Kanadadan evakuatsiya qilishda yordam so‘rab, AQShdagi diplomatik vakolatxonalarga murojaat qilishmoqda. AQSh—Kanada chegarasi vaqtincha yopilishi munosabati bilan konsullik xodimlari ularni Ottava va Torontodan reyslar bilan bog‘lanadigan Toshkent—Istanbul—Toshkent yo‘nalishidagi charter parvozlari ro‘yxatiga kiritishda yordam bermoqda.

AQShdagi diplomatik missiyalar xabariga ko‘ra, 6-avgust holati bo‘yicha yo‘lovchilar kutish ro‘yxatida 803 nafar fuqaro bor. Mamlakatning Vashingtondagi elchixonasi va Nyu-Yorkdagi bosh konsulligi fuqarolar bilan doimiy aloqada. Charter reyslarda uyga qaytishni istagan yo‘lovchilar ro‘yxati har kuni yangilanadi. Koronavirusga qarshi kurash bo‘yicha Respublika maxsus komissiyasining jadvaliga binoan navbatdagi parvoz 13-avgustga rejalashtirilgan.

Shu munosabat bilan Vashington va Nyu-York shaharlaridagi konsullik idoralari yaqin oylarda O‘zbekistonga borishni rejalashtirgan fuqarolarga elchixona yoki bosh konsullikka AQShdan O‘zbekistonga keyingi charter reyslarda parvoz qiluvchi yo‘lovchilar ro‘yxatiga kiritishni so‘rab murojaat etishni tavsiya qilgan.