Сўнгги уч ой ичида коронавирус пандемияси туфайли қийин аҳволда қолган барча ўзбекистонликлар АҚШ ва Канададан эвакуация қилинди. Бу ҳақда «Kun.uz» Ўзбекистоннинг Вашингтондаги элчихонаси ва мамлакатнинг Нью-Йоркдаги бош консуллигига таяниб хабар бермоқда.
Маълумотларга кўра, кеча Тошкент вақти билан соат 22:00 (маҳаллий вақт билан 13:00)да бортида Ўзбекистон фуқаролари бўлган Uzbekistan Airways’нинг чартер рейси Нью-Йоркдан парвоз қилган.
Қайд этилишича, фуқароларни Ўзбекистонга чартер рейсларида босқичма-босқич олиб келиш бўйича кўрилган чоралар натижасида сўнгги уч ой ичида коронавирус пандемияси туфайли қийин аҳволда қолган барча ўзбекистонликлар АҚШ ва Канададан эвакуация қилинган. Навбатдаги махсус рейсда 3 нафар янги туғилган чақалоқ билан 174 нафар фуқаро жўнаб кетди. Шу билан бирга, 778 нафар ўзбекистонлик парвоздан бош тортди ва уни дунёдаги эпидемиологик вазият яхшилангунга қадар кечиктирди.
Июнь—август ойларида Америка қитъасидан жами 1200 киши эвакуация қилинган, уларнинг 26 нафари чет эл фуқаролари ҳисобланади.
Таъкидланишича, Ўзбекистон фуқаролари Канададан эвакуация қилишда ёрдам сўраб, АҚШдаги дипломатик ваколатхоналарга мурожаат қилишмоқда. АҚШ—Канада чегараси вақтинча ёпилиши муносабати билан консуллик ходимлари уларни Оттава ва Торонтодан рейслар билан боғланадиган Тошкент—Истанбул—Тошкент йўналишидаги чартер парвозлари рўйхатига киритишда ёрдам бермоқда.
АҚШдаги дипломатик миссиялар хабарига кўра, 6 август ҳолати бўйича йўловчилар кутиш рўйхатида 803 нафар фуқаро бор. Мамлакатнинг Вашингтондаги элчихонаси ва Нью-Йоркдаги бош консуллиги фуқаролар билан доимий алоқада. Чартер рейсларда уйга қайтишни истаган йўловчилар рўйхати ҳар куни янгиланади. Коронавирусга қарши кураш бўйича Республика махсус комиссиясининг жадвалига биноан навбатдаги парвоз 13 августга режалаштирилган.
Шу муносабат билан Вашингтон ва Нью-Йорк шаҳарларидаги консуллик идоралари яқин ойларда Ўзбекистонга боришни режалаштирган фуқароларга элчихона ёки бош консулликка АҚШдан Ўзбекистонга кейинги чартер рейсларда парвоз қилувчи йўловчилар рўйхатига киритишни сўраб мурожаат этишни тавсия қилган.
Изоҳ (0)