Prezident Shavkat Mirziyoyev 6-avgust kuni bu yil oliy o‘quv yurtlariga qabulni tashkil etish va 2020/2021-o‘quv yiliga tayyorgarlik masalalariga bag‘ishlangan yig‘ilish o‘tkazdi.
Yig‘ilishda o‘quv jarayonini yuqori sifatli o‘quv resurslari bilan boyitish uchun iqtidorli professor-o‘qituvchilarni jalb qilish zarurligi ta’kidlandi.
Oliy va o‘rta maxsus ta’lim vazirligi 25-avgustgacha barcha 7 200 dan ziyod fan bo‘yicha nazariy va amaliy mashg‘ulotlarning raqamli uslubiy ta’minotini va masofaviy ta’limga moslashtirilgan o‘quv dasturlarini yaratishi belgilandi.
Kamida 35 ta davlat universitetlarida birinchi o‘quv yili kredit-modul tizimiga muvofiq tashkil qilinishi rejalashtirilgan.
“Taraqqiy etgan davlatlar tajribasi ta’lim dargohlarini zamon talablariga moslashtirmasdan ilmiy va texnologik yutuqlarga erishish qiyin bo‘lishini ko‘rsatmoqda” – dedi Prezident Shavkat Mirziyoyev.
Shu munosabat bilan, bu yil O‘zbekistondagi kamida 5 ta universitet nufuzli xorijiy universitetlar bilan hamkorlikda transformatsiya jarayonlaridan o‘tadi. Shu bilan birga, o‘qitishning tuzilishi va texnologiyalari yaxshilanadi, natijada universitetlar zamonaviy ta’lim berish va innovatsiyalarni joriy etishga qodir ilmiy muassasalarga aylantiriladi.
Yig‘ilish yakunida davlat rahbari respublika miqyosidagi universitetlarning rektorlari bilan shaxsan suhbatlashdi, mas’ul shaxslarga bildirilgan muammo va takliflarni hal qilish bo‘yicha aniq ko‘rsatmalar berdi.
Avval 2020/2021-o‘quv yili uchun kirish imtihonlari Toshkent shahri va viloyat markazlarining ochiq markaziy stadionlarida bo‘lib o‘tishi haqida xabar berilgan edi.
Mavzuga doir:
- O‘zbekistonda yangi o‘quv yilidan agrar ta’limning bakalavriat yo‘nalishlari bosqichma-bosqich kredit-modul tizimiga o‘tkaziladi
- Karantin sababli O‘zbekiston OTMlarida kontrakt pulini to‘lash tizimiga o‘zgartirish kiritildimi?
- O‘zbekistonda o‘zini o‘zi moliyalashtirishga o‘tgan OTMlar to‘lov-kontrakt miqdorini e’lon qildi
Izoh (0)