Chililik futbolchi Aleksis Sanches “Manchester Yunayted” bilan o‘rtadagi shartnomasini bekor qilgan holda Milanning “Inter” klubi a’zosiga aylangani haqida xabar berilgandi.
The Guardian nashri Sanchesning qaysi shartlar asosida “Inter”ga yo‘l olgani haqida ma’lumotlarni oshkor qildi.
Qayd etilishicha, shartnomaning muddatidan avval bekor qilinishi sabab “Manchester Yunayted” Sanchesga 7,5 million funt sterling miqdoridagi mablag‘ni to‘lagan. Mankunianlar bu orqali 40 million funt tejab qolgan. Boisi Sanches yana ikki yil “Yunayted”da qolganida shartnomaga ko‘ra aynan shuncha mablag‘ ishlab topardi.
Aleksis “Manchester Yunayted”da haftasiga 390 ming funt ishlab topgan. Klub hatto Sanches “Inter”da ijarada bo‘lgan vaqtda ham ushbu mablag‘ning ma’lum qismini to‘lab borgan.
Ma’lumot uchun, Aleksis Sanches 2019/20-yilgi mavsumni ijara asosida “Inter” safida o‘tkazdi. U klub safida barcha musobaqalarda 29 ta o‘yin o‘tkazib, 4 ta gol urdi va 10 ta golli uzatmani amalga oshirdi. Hakamlar tomonidan 3 ta sariq va 1 ta qizil kartochka bilan siylandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)