Irlandiyalik sobiq bokschi Kevin Makbrayd afsonaviy Mayk Tayson bilan ikkinchi marta jang qilishga tayyorligini ma’lum qildi.
“Buni amalga oshirsak yaxshi bo‘lardi. Albatta, men u bilan yana uchrashishni xohlardim. Bu dunyoda hech narsani istisno qilib bo‘lmaydi. Bu ajoyib bo‘ladi. Ishonchim komilki, Mayk ushbu mag‘lubiyat uchun revansh olishni xohlaydi. Men xursandchilik bilan unga qarshi jang qilgan bo‘lardim. Jangdan oladigan gonorarim bolalarimning o‘qishi uchun pul to‘lashda yordam beradi”, — deydi Makbrayd.
Eslatib o‘tamiz, Makbrayd va Tayson o‘rtasidagi jang 2005-yilning 11-iyunida bo‘lib o‘tgan. Oltinchi raunddan so‘ng, Tayson ustunlikni qo‘lga kiritib turganiga qaramay, kutilmaganda jangni davom ettirishdan bosh tortadi. Irlandiyalik bokschiga esa texnik g‘alaba yoziladi. Jang tugaganidan so‘ng, Tayson 39 yoshida faoliyatini yakunlaganini e’lon qilgandi.
Mayk Tayson va Kevin Makbrayd o‘rtasidagi jangni tomosha qiling (video)
Ma’lumot uchun, Makbrayd hozir 47 yoshda, Tayson esa 54 yoshda.
Avvalroq Tayson 12-sentabr kuni Los-Anjelesda Roy Jons bilan 8 raunddan iborat bo‘lgan jang o‘tkazishi haqida xabar berilgandi.
Mayk Tayson professional boksda 58 ta jang o‘tkazib, ularning 50 tasida g‘alaba qozongan. 44 ta jangda raqiblarini nokautga uchratgan. Oltita jangda mag‘lub bo‘lgan. Ikkita jangi esa hisoblanmagan.
Kevin Makbrayd esa prof boksda 46 ta jang o‘tkazib, ularning 35 tasida g‘alaba qozongan. 29 ta jangda raqiblarini nokautga uchratgan. 10 ta jangda mag‘lub bo‘lgan. Yana 1 ta jangda esa murosa yo‘lini tanlagan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)