Ирландиялик собиқ боксчи Кевин Макбрайд афсонавий Майк Тайсон билан иккинчи марта жанг қилишга тайёрлигини маълум қилди.
«Буни амалга оширсак яхши бўларди. Албатта, мен у билан яна учрашишни хоҳлардим. Бу дунёда ҳеч нарсани истисно қилиб бўлмайди. Бу ажойиб бўлади. Ишончим комилки, Майк ушбу мағлубият учун реванш олишни хоҳлайди. Мен хурсандчилик билан унга қарши жанг қилган бўлардим. Жангдан оладиган гонорарим болаларимнинг ўқиши учун пул тўлашда ёрдам беради», — дейди Макбрайд.
Эслатиб ўтамиз, Макбрайд ва Тайсон ўртасидаги жанг 2005 йилнинг 11 июнида бўлиб ўтган. Олтинчи раунддан сўнг, Тайсон устунликни қўлга киритиб турганига қарамай, кутилмаганда жангни давом эттиришдан бош тортади. Ирландиялик боксчига эса техник ғалаба ёзилади. Жанг тугаганидан сўнг, Тайсон 39 ёшида фаолиятини якунлаганини эълон қилганди.
Майк Тайсон ва Кевин Макбрайд ўртасидаги жангни томоша қилинг (видео)
Маълумот учун, Макбрайд ҳозир 47 ёшда, Тайсон эса 54 ёшда.
Аввалроқ Тайсон 12 сентябрь куни Лос-Анжелесда Рой Жонс билан 8 раунддан иборат бўлган жанг ўтказиши ҳақида хабар берилганди.
Майк Тайсон профессионал боксда 58 та жанг ўтказиб, уларнинг 50 тасида ғалаба қозонган. 44 та жангда рақибларини нокаутга учратган. Олтита жангда мағлуб бўлган. Иккита жанги эса ҳисобланмаган.
Кевин Макбрайд эса проф боксда 46 та жанг ўтказиб, уларнинг 35 тасида ғалаба қозонган. 29 та жангда рақибларини нокаутга учратган. 10 та жангда мағлуб бўлган. Яна 1 та жангда эса муроса йўлини танлаган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)