Koronavirus pandemiyasi O‘zbekistonga doimiy yashash uchun kelayotganlar sonini sezilarli darajada kamaytirdi, deb xabar beradi Davlat statistika qo‘mitasi.
Qayd etilishicha, 2020-yil yanvar–iyun oylarida O‘zbekistonga 577 kishi — yanvar–mart oylarida 409 kishi, aprel–iyun oylarida 168 kishi mamlakatga yashash uchun kelgan.
Natijada O‘zbekistonda yashash uchun ko‘chib kelganlar soni 2019-yilning shu davriga nisbatan deyarli 2,5 baravar kamaygan. Bu ko‘rsatkich o‘tgan yili 1361 kishini tashkil qilgan.
O‘zbekistondan yil boshidan beri 4710 kishi ketgan. Bu 2019-yilning shu davridagi ko‘rsatkichdan atigi 137 kishiga kamdir.
Statistikaga ko‘ra, yanvar–mart oylarida 1906 kishi mamlakatni tark etgan. E’tiborli tomoni pandemiya vaqtida, ya’ni aprel–iyun oylarida mamlakatdan 2804 kishi xorijda yashash uchun chiqib ketgan.
Ta’kidlanishicha, mamlakatga Qozog‘istondan 186 kishi, Tojikistondan 145 kishi, Rossiyadan 124 kishi, Qirg‘izistondan 37 kishi, Turkmanistondan 9 kishi va boshqa davlatlardan 76 kishi kelgan.
Hududlar bo‘yicha boshqa mamlakatlardan Toshkent viloyatiga 197 kishi, Toshkent shahriga 170 kishi va Qoraqalpog‘istonga 67 kishi ko‘chib kelgan.
Bu vaqt davomida O‘zbekistondan Qozog‘istonga 2770 kishi, Rossiyaga 1737 kishi, Qirg‘izistonga 28 kishi. Isroilga 37 kishi, Tojikistonga 18 kishi va boshqa davlatlarga 120 kishi ko‘chib ketgan. E’tiborli jihati o‘zbekistonliklar ko‘p ko‘chib ketadigan davlatlarning ro‘yxatini AQSh tark etdi.
Viloyatlar kesimida oladigan bo‘lsak, eng ko‘p odam Qoraqalpog‘istondan (1460 kishi) xorijga ko‘chib ketgan. Shuningdek, Toshkent viloyati (1274 kishi) va Toshkent shahri ham (1132 kishi) mamlakatni tark etganlar soni bo‘yicha yetakchilik qilmoqda.
Izoh (0)