Shavkat Mirziyoyev tavallud kuni munosabati bilan tabrik yo‘llagan davlat va hukumat rahbarlari, xalqaro tashkilotlar rahbarlariga minnatdorlik bildirdi. Bu haqda Prezident matbuot xizmati xabar berdi.
“Tavallud topgan kunim munosabati bilan chin dildan tabriklab, samimiy qutlov va ezgu tilaklarni yo‘llagan davlat va hukumat boshliqlariga, xorijiy siyosat va jamoat arboblari, xalqaro tashkilotlar rahbarlariga, ishbilarmon doiralar vakillariga, yurtimizdagi mahallalar va mehnat jamoalariga, turli kasb egalari bo‘lgan barcha vatandoshlarimizga chuqur minnatdorligimni izhor etaman.
Mening sha’nimga bildirilgan, men uchun g‘oyat qadrli bo‘lgan ushbu tabrik va tilaklarni, avvalambor, O‘zbekiston xalqi va davlatiga yuksak hurmat va ehtirom, mamlakatimizning bugungi va ertangi kuniga bo‘lgan ishonch ifodasi sifatida qabul qilaman.
Fursatdan foydalanib, mehnatsevar, bag‘rikeng va olijanob xalqimizga yana bir bor chin qalbimdan farzandlik mehrimni va hurmatimni bildiraman.
Ko‘p millatli xalqimiz bilan birga bugungi murakkab sinovlardan munosib o‘tib, jonajon O‘zbekistonimiz ravnaqi va el-yurtimiz farovonligi yo‘lida oldimizga qo‘ygan ulkan maqsadlarga albatta yetamiz, deb ishonaman”, — deyiladi Prezident maktubida.
Ma’lumot uchun, Shavkat Mirziyoyev 2020-yil 24-iyul kuni 63 yoshga to‘ldi. Shu munosabat bilan Qozog‘iston prezidenti Qosim-Jo‘mart To‘qayev, Rossiya prezidenti Vladimir Putin, Turkiya prezidenti Rajab Toyyib Erdo‘g‘on, Qirg‘iziston prezidenti So‘ronboy Jeenbekov, Tojikiston prezidenti Emomali Rahmon, Turkmaniston prezidenti Gurbanguli Berdimuhamedov va Qozog‘iston birinchi prezidenti Nursulton Nazarboyev tavallud kuni bilan tabrikladi
Shuningdek, O‘zbekiston Prezidentining tug‘ilgan kuni munosabati bilan bir qator xorijiy davlatlar, hukumatlar va parlamentlar rahbarlari, taniqli davlat va jamoat arboblaridan qutlovlar keldi.
Izoh (0)