Ozarbayjon Mudofaa vazirligi agar Yerevan Ozarbayjondagi strategik obyektlarni o‘qqa tutadigan bo‘lsa, Armanistondagi Metsamor atom elektr stansiyasiga yuqori aniqlikdagi raketa zarbasi berish bilan tahdid qildi. Bu haqda Ozarbayjon Mudofaa vazirligi matbuot xizmati rahbari Vagif Dargyaxli 16-iyul, payshanba kuni ma’lum qildi, deb yozmoqda “Korrespondent.net”.
“Armaniston tomoni shuni unutmasligi kerakki, bizning qurolli kuchlarimizda mavjud bo‘lgan eng yangi raketa tizimlari yuqori aniqlik bilan Metsamor AESga zarba bera oladi, bu esa Armaniston uchun katta fojia bo‘ladi”, — degan vazirlik vakili.
Shu tariqa, vazirlik vakili Armaniston tomonining Ozarbayjondagi Mingechevir suv omboriga zarba berish haqidagi tahdidiga munosabat bildirdi. Bayonot Armaniston va Ozarbayjon chegarasidagi otishmalar fonida qilingan.
Eslatib o‘tamiz, Ozarbayjon va Armaniston chegarasidagi to‘qnashuv Ozarbayjon shimoli-g‘arbidagi Tovuz viloyati hududida 12-iyulda sodir bo‘lgan. Ozarbayjon Mudofaa vazirligi Armanistonni o‘t ochish haqidagi ahdlashuvni qo‘pol ravishda buzganlik va mamlakat artilleriyasi joylashgan pozitsiyaga hujum qilganlikda ayblamoqda. Idora bergan ma’lumotga asosan, ikkala tomonda ham jang qurbonlari bor. Xususan, Ozarbayjon generali va polkovnigining halok bo‘lgani xabar qilindi.
BMT bosh kotibi Antoniu Gutterish Armaniston va Ozarbayjondan zudlik bilan harbiy harakatlarni to‘xtatishni talab qilgan.
Boku aholisi esa Armaniston va Ozarbayjon chegarasida yuzaga kelgan jangovar harakatlar sabab mamlakat armiyasini qo‘llab-quvvatlash maqsadida noqonuniy miting o‘tkazdi.
Ozarbayjon prezidenti Ilhom Aliyev mamlakatining Armaniston chegarasida harbiy harakatlarni boshlashga intilmaganligini, Ozarbayjon uchun Armaniston bilan harbiy nizoga borishdan ma’no yo‘qligini ma’lum qildi.
O‘zbekiston ikki davlatni chegarada yuz bergan mojaroni tinch yo‘l bilan hal qilishga chaqirdi.
Izoh (0)