Nurmat Otabekov ba’zi sog‘ odamlarga qilinmagan muolajalar uchun katta xarajatlar yozilayotganiga oid xabarlarga munosabat bildirdi

AOKA huzuridagi shtabda 16-iyul, payshanba kuni tashkil etilgan brifingda Sanitariya-epidemiologiya nazorati davlat inspeksiyasi bosh inspektori Nurmat Otabekov fuqarolardan kelayotgan koronavirus bilan bog‘liq savollarga javob qaytardi.

“Daryo” muxbirining xabar berishicha, Otabekov O‘zbekistonda koronavirusga chalingani tufayli karantinga olingan ayrim shaxslarga qilinmagan muolaja uchun millionlab xarajat sarflangani haqidagi hujjatlarga imzo qo‘ydirib olinayotgani haqidagi xabarlarga munosabat bildirgan.

“Karantinga joylashtirilgan fuqarolarga ularning shikoyatlari va ahvoliga qarab kerakli muolajalar o‘tkazilgan. Bu ishlar hozir ham olib borilmoqda.

Karantinga joylashtirilganlar — bular hali bemorlar emas, balki koronavirus infeksiyasini yuqtirganlikda gumon qilinganlardir. Chunki ular epidemiologik noxush hududlardan kelishgan, bemorlar bilan aloqada bo‘lgan bo‘lishlari mumkin.

Shuning uchun karantindagilarga davolash muolajalari o‘tkazilmaydi. Bunga umuman ehtiyoj ham yo‘q. Karantin davrida ularning salomatligi kuzatuvga olinadi, xolos. Agarda kuzatuv paytida ularda kasallikning u yoki bu klinik belgilari paydo bo‘lsa, laboratoriya natijalari musbat natija beradigan bo‘lsa, u holda bu shaxs yuqumli kasalliklarni davolashga ixtisoslashgan shifoxonalarga o‘tkaziladi va u yerda tegishli davolash muolajalarini oladi.

Faqat ba’zi holatlarda, masalan, karantinga olingan shaxsning yoshi katta bo‘lsa, yondosh va har xil surunkali kasalliklar bo‘lsa, bu kabi shaxslarga karantin zonasida ham tibbiy yordam ko‘rsatiladi, muolajalar belgilanadi”, — dedi Nurmat Otabekov.