Namanganda xorijdan qaytganidan so‘ng karantin qoidalariga rioya etmagan shaxs 30 dan ortiq kishiga koronavirus yuqtirdi

Namangan viloyatida 2020-yil 23-martdan 1-iyulga qadar koronavirus infeksiyasiga chalinish bilan bog‘liq 300 ta holat qayd etilgan bo‘lsa, 1- iyuldan to shu kunga qadar kasallanganlarning umumiy soni 442 taga yetdi. Bu haqda viloyat hokimi Xayrullo Bozorov viloyat aholisiga qilgan telemurojaatida ma’lum qildi, deya xabar beradi “Daryo” muxbiri Azizbek Abduvaliyev.

Bozorovning qayd etishicha, hozirda davolanayotgan 124 kishidan 108 nafarining holati qoniqarli bo‘lib, 16 nafar bemor bilan bog‘liq vaziyat o‘rta va og‘ir deya baholanmoqda.

“Iyul oyida koronavirus infeksiyasiga chalinish bilan bog‘liq kuniga 20-25 tagacha holat kuzatildi. Bu nimadan dalolat beradi? Karantin talablari yumshatilganining noto‘g‘ri talqin qilingani, belgilangan tartib-qoidalarga rioya etilmagani shunday og‘ir asoratlarga olib keldi. Namangan viloyati tibbiy niqoblar ishlab chiqarish bo‘yicha respublikada birinchi o‘rinda turadi, ayrim korxonalarimiz bu mahsulotni hatto xorijga ham eksport qilmoqda. Lekin o‘zimizda ba’zan niqoblarni taqmay yo nomiga taqib yuribmiz. 30 kishilik to‘ylarga ruxsat berilganda esa har soatga o‘ttiz kishidan mehmon aytish boshlandi. Bu bilan kimni aldamoqchi bo‘lyapmiz? Birinchi galda o‘zimizni emasmi?”, — dedi viloyat hokimi.

Xayrullo Bozorov Yaponiya va Janubiy Koreyada koronavirus infeksiyasiga qarshi kurashda erishilayotgan yutuqlarga e’tibor qaratar ekan, ularning zamirida ommaviy tadbirlardan tiyilish, oraliq masofani saqlash, qo‘l berib so‘rashmaslik, niqob taqish va shaxsiy gigiyenaga rioya etish kabi oddiy qoidalar yotganiga urg‘u berdi.

— Toshkentdagi oliygohlardan birida tahsil olgan kursantlarning ta’tildan qaytishi xonadonlardan birida to‘yga aylanib ketgan. Qarindosh-urug‘, oshna-og‘aynilar yig‘ilib kelgan. Oqibatda hozirgacha 10 dan ortiq kishida koronavirus aniqlandi. Xorijdan qaytgan yana bir hamyurtimiz 14 kunlik karantin talablarini unutib, yaqinlarining uyiga borgan, ular uni yo‘qlab kelgan. Bu bilan ushbu fuqaro 30 nafardan oshiq kishiga infeksiya yuqishiga sababchi bo‘ldi. Shunday achinarli holatlar ko‘zimizni ochishi, aytilayotgan talab va tavsiyalarga qat’iy rioya etishga undashi kerak, — dedi viloyat hokimi.