Rossiyaning Amur viloyati gurbernatori Vasiliy Orlov Renaissance Heavy Industries pudratchi kompaniyasi vakillari hamda Amur gazni qayta ishlash zavodi quruvchilari o‘rtasidagi to‘qnashuvdan keyin ishchilarga turli shakldagi yordamlar taklif qilinganini bildirdi. Bu haqda “RIA Novosti” xabar qilgan.
“Rossiya 24” telekanalida efirga berilgan videoda zavod hududidagi ishchilar isyon ko‘targani, zavod oshxonasi va hovlisidagi boshqa binolarga zarar yetkazgani, huquq-tartibot idoralari xodimlariga faol qarshilik ko‘rsatgani hamda mashinalarni ag‘darib tashlagani aks etgan.
Mazkur holatlar yuzasidan Amur viloyati prokuraturasi tomonidan Rossiya qonunchiligiga muvofiq “Bezorilik” hamda “Ommaviy tartibsizliklar” moddalari bo‘yicha jinoiy ishlar ochilgani xabar qilingandi. Pudratchi kompaniya hamda o‘zbekistonlik quruvchilar o‘rtasidagi ixtilofga mehnat patentini to‘lash masalasining hal etilmagani sabab bo‘lgan. “Rossiya 24” telekanalining xabar berishicha, quruvchilar uch oylik karantin davri uchun maosh to‘lanishini talab qilgan.
Orlov 13-iyul kuni zavodga borgan va ishchilar bilan uchrashgan, zavod hududida kompaniya rahbarlari, quruvchilar yetakchilari, huquq tartibot va nazorat organlari xodimlari ishtirokida uchrashuv o‘tkazilgan.
“Ishchilarga iqtisodiy tomondan ko‘mak taklif qilindi. Ushbu mablag‘ ichiga karantin davridagi kompensatsiya puli va vaxtada olti oy va undan ko‘proq bo‘lganlarga bir martalik maosh miqdoridagi to‘lov ham kiritilgan. Renaissance Heavy Industries kompaniyasi ushbu choralar ko‘rilishiga kafil bo‘lgan. Pandemiya davrida ishchilarni har tomonlama qo‘llab-quvvatlash masalasi o‘tkir muammo va quruvchilarda charchoq mavjud. Biz mazkur muammoga yaqin orada barham berilishiga umid qilamiz”, — deya Orlov so‘zlarini keltirgan “RIA Novosti”.
Qayd etilishicha, qurilish maydonchasidagi asosiy ishlar tegishli tartibda davom etmoqda va loyihaga, taxminan, 29 ming nafar ishchi jalb qilingan.
“Qurilish maydonlarida huquq-tartibot idoralarining xodimlari ham ish faoliyatini davom ettirmoqda”, — deyiladi viloyat ma’muriyatining bayonotida.
Avval Rossiyaning Amur viloyatida gazni qayta ishlash zavodi qurilishini amalga oshirayotgan Renaissance Heavy Industries kompaniyasi ishchilari uch oy davomida maosh olmaganligi sababli isyon ko‘targani, O‘zbekistonning Rossiyadagi elchixonasi tomonidan mazkur holat nazoratga olingani va mazkur masala bo‘yicha Rossiya Ichki ishlar vazirligi, boshqa vakolatli organlar bilan muntazam muloqot olib borilayotgani xabar qilingandi.
Izoh (0)