Gonkongda koronavirus tarqalishi tezlashgani sababli 13-iyuldan bir qator cheklov choralari joriy etildi, deb xabar bermoqda “TASS”.
Xususan, fuqarolarga hozirgidek 50 nafargacha emas, 4 nafardan ortiq kishining guruh bo‘lib to‘planishi taqiqlandi.
“Hozir, epidemiologik vaziyat yanada keskinlashgan paytda, ijtimoiy masofalanish bo‘yicha choralarni yana kuchaytirishimizga to‘g‘ri keladi”, — degan Gonkong administratsiyasi boshlig‘i Kerri Lam.
Shuningdek, restoranlar ishini qisqartirishga qaror qilingan. Endilikda mijozlarga soat kechki 6 dan keyin restoranlarga kirish taqiqlanib, ular faqat buyurtma qilingan ovqatni olib ketishlari mumkin.
Bundan tashqari, barcha turdagi jamoat transportida va taksilarda niqob taqish tartibi joriy etilmoqda. Tungi klublar, o‘yingohlar, kinoteatr, sportzal kabi ko‘ngilochar joylar bir haftaga yopiladi.
Ma’lumot uchun, Gongkongda so‘nggi sutkada koronavirusga chalinish bo‘yicha 52 ta holat aniqlangan. Ularning 11 tasi chetdan yuqtirilgan. Umumiy hisobda esa 1522 kishi kasallangan, ulardan 8 nafari vafot etgan.
Mavzuga doir: Gonkongda maktablar koronavirus sabab yana yopiladi
Izoh (0)