Yer aholisining soni 7,8 milliardga yetdi. Bu haqda 10-iyul kuni Germaniyaning “Yer aholisi” fondi (Stiftung Weltbevölkerung — DSW) xabar qilgan.
Fond xabarida Yer sayyorasida yashovchi aholi soni har yili 82 million nafarga ko‘payayotgani va bu Germaniyada yashaydigan fuqarolar soniga teng ekani qayd etilgan. Butun dunyoda har soniyada o‘rtacha 2,6 nafar chaqaloq tug‘iladi.
DSW ekspertlari aholi sonining bunday yuqori sur’atlarda ko‘payishiga ayrim mamlakatlarda, ayniqsa uchinchi dunyo davlatlarida erta homiladorlik, erta nikoh holatlari sabab bo‘layotganini qayd etgan. Butun dunyoda har beshta homiladorlikdan ikkitasi ayol irodasiga zid ravishda yuzaga kelishi aytilgan. Ekspertlar ushbu vaziyatni aholi orasida targ‘ibot ishlarini olib borish orqali bartaraf etish mumkin deb hisoblamoqda.
DSW ma’lumotiga ko‘ra, Afrika qit’asidagi mamlakatlarda bu boradagi vaziyat ancha og‘ir, xususan Sahroyi Kabir atroflarida har ikkinchi ayol jinsiy himoya vositalariga ega emas. Garchi ushbu hududda tug‘ilishlar soni nisbatan kamaygan bo‘lsa ham har onaga 4,4 nafardan bola (butun dunyoda bu ko‘rsatkich 2,4 chaqaloqni tashkil qiladi) to‘g‘ri kelmoqda. Oqibatda BMT prognozlari bo‘yicha 2050-yilga borib mintaqadagi aholi soni 1,3 milliarddan 2,5 milliardga yetadi.
2017-yil dekabr oyida Yer yuzi aholisi 2018-yil 1-yanvarda 7,4 milliard kishiga yetishi, 2019-yil iyun oyida esa BMTning Yer yuzi aholisi 2100-yilga kelib 10 milliard kishidan oshishi mumkinligini prognoz qilgani haqida xabar berilgan.
Izoh (0)