Qozog‘istonning Olmaota shahri rasmiylari shaharda yaqin kunlarda kuzatilayotgan o‘tkir respirator virusli infeksiyalar (O‘RVI) va pnevmoniyaga chalinganlar soni ortganini epidemiya deb atadi. Bu haqda shahar hokimi Bakitjan Sag‘intayev o‘zining Instagram’dagi sahifasida ma’lum qildi.
“So‘nggi bir oy ichida shaharda O‘RVI va pnevmoniya kasalliklari soni 5 baravar oshdi, buni biz epidemiyaning namoyon bo‘lishi sifatida ko‘ryapmiz. Mos ravishda tez yordamga murojaatlar soni ham keskin oshdi. Agar may oyida 2,5 mingtacha qo‘ng‘iroqlar qabul qilingan bo‘lsa, iyun oyida sutkasiga 4 mingtagacha chaqiriqlar bo‘ldi. Bitta brigadaga tushadigan kunlik yuklamalar soni ikki baravar oshib, 19 ta qo‘ng‘iroqni tashkil etmoqda”, — deb yozgan hokim.
Uning so‘zlariga ko‘ra, hozirda koronavirusning tarqalishi davrida yuqumli kasalliklar shifoxonasi va provizorlardan tashqari, birlamchi tibbiy yordam xizmatiga yuklama keskin oshgan.
“Bugungi sharoitda ushbu bosqichda ‘yuqumli kasalliklar virtual kasalxonasi’ tashkil etilgan. Poliklinikalarda COVID-19 simptomlari bo‘lgan va kasallik tasdiqlangan mijozlar monitoringi uchun mobil guruhlar tuzilgan. Asfendiyarov nomidagi xalqaro tibbiyot universiteti bilan hamkorlikda Kardiologiya va ichki kasalliklar ilmiy-tadqiqot instituti negizida Mijozlar monitoringi markazi ochildi. Uning vazifasi xavf ostida bo‘lgan bemorlarni kecha-yu kunduz kuzatib borish va davolashdir. Bu bizga ambulatoriya darajasida, ayniqsa qariyalarda kasallik asoratlarini minimallashtirish imkonini beradi”, — deb ta’kidlagan Olmaota hokimi.
Ayni paytda koronavirus va pnevmoniyaga chalinganlar soni ortib borishi butun Qozog‘iston bo‘ylab kuzatilmoqda. Olmaotada 6201 kishi koronavirusga chalingani tasdiqlangan. Shundan 2281 nafari sog‘aygan, 26 nafari vafot etgan. Butun mamlakat bo‘ylab esa koronavirusga chalinganlar soni 25 021 kishiga yetgan. Hozirga qadar 15 860 kishi sog‘aygan, 188 kishi virus qurboniga aylangan. Shuningdek, 23 553 kishi koronavirusni belgisiz tashuvchi sifatida qayd etilgan.
Avvalroq Butunjahon shifokorlar kasaba uyushmasi (WMA) sobiq rahbari Leonid Eydelman kasallikning ikkinchi to‘lqiniga jiddiy tayyorgarlik ko‘rish kerakligi, chunki u vaqtda COVID-19 O‘RVI epidemiyasi davrida parallel ravishda tarqalishi mumkinligini aytib o‘tgandi.