O‘zbekistonda pandemiya davrida 1,2 ming ayolning mehnat huquqlari tiklandi

Xalqaro mehnat tashkiloti (XMT)ning Global sammiti davomida Yevropa va O‘rta Osiyoda koronavirus pandemiyasining mehnat bozorlariga ta’siriga qarshi kurashish yo‘llari va kelajakdagi istiqbollarini muhokama qilish maqsadida 1-iyul, chorshanba kuni mintaqaviy sessiyalardan biri bo‘lib o‘tdi. Bu haqda “Daryo”ga Mehnat vazirligi xabar berdi.

Markaziy Osiyo mintaqasidan O‘zbekiston bandlik va mehnat munosabatlari vaziri Nozim Husanov ishtirok etdi. U ishtirokchilarni mamlakat mehnat bozori uchun pandemiya oqibatlarini bartaraf etishning mahalliy tajribalari bilan tanishtirdi.

O‘z nutqida Nozim Husanov ish joylarida ishchilarni himoya qilish bo‘yicha ko‘rilayotgan choralar haqida to‘xtalib o‘tdi.

Birinchi navbatda, Davlat mehnat inspeksiyasi epidemiologiya xizmati bilan birgalikda korxonalarda sanitariya me’yorlari va mehnat xavfsizligini ta’minlash tizimi monitoringini yo‘lga qo‘ydi.

Bugungi kunga qadar mehnat inspektorlarining monitoring guruhlari 5757 korxonada bo‘lib, ularning 892 tasida xavfsizlik va mehnat gigiyenasi me’yorlarining buzilishi aniqlandi. Har bir vaziyatni alohida o‘rganish uchun inspektorlarga tavsiya berildi.

Pandemiya paytida noqonuniy ishdan bo‘shatish masalalari kun tartibida paydo bo‘ldi, ish haqini, homiladorlik hamda tug‘ruq nafaqasini to‘lashdan bosh tortish hollari ko‘paydi.

Tekshiruvlar natijalariga ko‘ra, 3,6 ming fuqaroning, shu jumladan, 1,2 ming ayolning mehnat huquqlari tiklandi.

Ko‘pgina korxona va tashkilotlar karantin-cheklov choralari sharoitida o‘z faoliyatlarini masofaviy ishlash rejimiga moslashtirdi. Bunday ish rejimiga o‘tish va barcha me’yorlarga rioya qilishni ta’minlash maqsadida Mehnat vazirligi “Xodimlarni masofaviy ish usuliga o‘tkazishning vaqtinchalik tartibi to‘g‘risida”gi nizomni ishlab chiqdi va joriy etdi.

Avvalroq Mehnat vazirligi O‘zbekistonda qancha odam doimiy daromad bilan ta’minlangani haqida xabar bergandi.