Марказий ҳарбий округига қарашли Самарқанд вилоятидаги «Сазаган» дала ўқув майдони фойдаланишга топширилди. Бу ҳақда округ матбуот хизмати хабар берди.
Маълум қилинишича, ушбу дала ўқув майдонининг очилиш маросимида Ўзбекистон мудофаа вазири генерал майор Баҳодир Қурбонов, Самарқанд вилояти ҳокими — ҳарбий-маъмурий сектор раҳбари Эркинжон Турдимов, Марказий ҳарбий округ қўшинлари қўмондонлиги, Мудофаа вазирлиги фахрийлари, давлат ва жамоат ташкилотлари вакиллари ҳамда ёшлар иштирок этди.
Маросимда «Сазаган» дала ўқув майдонининг қурилишида жонбозлик кўрсатган бир гуруҳ ҳарбий хизматчилар ҳамда қурувчи-пудратчи ташкилот вакиллари Мудофаа вазирлиги ва Самарқанд вилояти ҳокими томонидан рағбатлантирилди.
Шундан сўнг мудофаа вазири бошчилигида тадбир иштирокчилари янгидан барпо этилган дала ўқув майдонида яратилган шарт-шароитлар, ўқув синфлари, тиббиёт пункти, ётоқхоналар, ошхона, спорт шаҳарчаси ҳамда жанговар техникалар паркини кўздан кечирди.
Меҳмонлар дала ўқув майдонини кузатиш давомида Марказий ҳарбий округи ҳарбий хизматчилари томонидан яратилган қўшинлар жанговар шайлигини оширишга хизмат қиладиган инновацион ишланмалар билан танишди.
Шунингдек, «Сазаган» дала ўқув майдонида замон талабларига жавоб берадиган 30 га яқин ўқув нуқталарда барча турдаги жанговар техника ва қуроллардан фойдаланган ҳолда кўргазмали жанговар ўқув-машғулотлари ўтказилиб, тадбир иштирокчиларига намойиш этилди.
Эслатиб ўтамиз, Қуролли Кучлар бўйича энг ихчам ҳамда ҳарбий амалий машғулотлар олиб боришда ўқув жойларининг кенг қамровлиги жиҳатидан Самарқанд гарнизонидаги «Сазаган» полигонининг расман очилиш маросими 2020 йилнинг 14 март кунига режалаштирилганди.
Изоҳ (0)