AQShning Afg‘oniston bo‘yicha maxsus vakili Zalmay Halilzod Pokiston, Qatar va O‘zbekistonga tashrif buyurib, Afg‘onistondagi tinchlik jarayonini muhokama qiladi. Bu haqda AQSh Davlat departamenti xabar berdi.
“Uchala joyda ham maxsus vakil Halilzod barcha afg‘onlarning afg‘onlararo muzokaralar arafasida qolgan majburiyatlarni bajarishini, ayniqsa, zo‘ravonlikni kamaytirish va mahbuslarni o‘z vaqtida ozod qilishni qo‘llab-quvvatlashga chaqiradi”, — deyiladi xabarda.
Ta’kidlanishicha, delegatsiya Afg‘onistonning iqtisodiy tiklanishiga ko‘maklashish va mintaqada tinchlik va barqarorlikni ta’minlash uchun bir qator sohalarda sarmoyaviy imkoniyatlar hamda hamkorlikni o‘rganadi.
Bundan tashqari, Halilzod Afg‘oniston rasmiylari bilan masofadan turib muzokaralar olib boradi.
Eslatib o‘tamiz, 2020-yilning fevral oyi oxirlarida Dohada AQSh va “Tolibon” tinchlik kelishuvini imzolagan edi. O‘shanda kelishuvni imzolashda AQSh tomonidan Zalmay Halilzod, “Tolibon” tarafdan esa harakat yetakchisining o‘rinbosari, harakatning Qatardagi ofisi rahbari mulla Abdulla G‘ani Barodar ishtirok etgandi.
Izoh (0)