Davlat shaharsozlik kadastri geoportali funksiyalari namoyish etildi

“O‘zGAShKLITI” davlat unitar korxonasi bo‘lim boshlig‘i Azimjon Primov O‘zbekiston Respublikasi davlat shaharsozlik kadastri” geoportalining taqdimotini o‘tkazdi. Taqdimot Qurilish vazirligining yangi loyihalarga bag‘ishlangan tadbiri doirasida tashkil etildi.

Geoportal test rejimida onlayn tarzda 2020-yil 3-fevralda ish boshlagan. Undan foydalanish ikkita yo‘nalishda tashkil qilingan. “Geoportalga kirish” qismi mutaxassislar, “Ochiq ma’lumotlar” tugmasi esa aholi va tadbirkorlarga mo‘ljallangan.

Tadbirkor geoportalga kirib, o‘zini qiziqtirgan hududda qanday shaharsozlik faoliyati obyektlarini muayyan shartlarni bajargan holda qurish mumkinligi yoki qaysi faoliyat turlari umuman ruxsat berilmasligi to‘g‘risida ma’lumot oladi. Shaharning kelajakda kengayish rejalari va kommunikatsiya, transport tarmoqlarining rivojlanish sxemalari bilan tanishgan holda o‘z biznesi uchun qulay muhitni tanlash imkonini beradi.

Ochiq foydalanishdagi foydalanuvchilar quyidagi ma’lumotlarni ko‘rishi mumkin.

Shahar va shaharchalarning bosh rejalari bo‘yicha:

• bosh rejalar ishlab chiqilganligi to‘g‘risida ma’lumotlar (kim tomonidan qachon ishlab chiqilgan, qachon tasdiqlangan va hokazo);
• bosh rejaning asosiy sxemasi (loyihaviy taklif);
• bosh rejaning tayanch sxemasi (loyihadan oldingi holat);
• transport sxemasi;
• asosiy texnik iqtisodiy ko‘rsatkichlar;
• qizil chiziqlar;

• funksional zonalar;
• geologik rayonlashtirish sxemalari.

Hududlarni arxitekturaviy rejalashtirishni tashkillashtirish loyihalari (APOT) bo‘yicha:

• hududlarni arxitekturaviy rejalashtirishni tashkillashtirish loyihalari (APOT) ishlab chiqilganligi to‘g‘risida ma’lumotlar (kim tomonidan qachon ishlab chiqilgan, qachon tasdiqlangan va hokazo);
• joylashuv sxemasi;
• tayanch sxemasi (hozirgi holat);
• asosiy sxemasi (loyihaviy taklif);
• asosiy texnik iqtisodiy ko‘rsatkichlar;
• funksional zonalar.

Foydalanuvchilar uchun login va parollari yordamida yuqorida keltirilgan ma’lumotlar bilan birga shaharsozlik hujjatlarida o‘rnatilgan cheklovlar (himoya zonalari), muhandislik kommunikatsiya tizimlari va ularni rivojlantirish rejalari to‘g‘risidagi ma’lumotlar bilan tanishish hamda ularni yuklab olish imkoniyati mavjud. Shuningdek, aholi punktlarini topish uchun manzillar reyestrida tashkillashtirilgan qidiruv tizimlaridan foydalanish mumkin.

Geoportalda bazis asos sifatida 6 ta ochiq kartografik resursga ulanish imkoniyati mavjud bo‘lib, foydalanuvchi o‘zi xohlagan resurs ma’lumotlaridan foydalanishi mumkin. Ortofotoplanlardan ham erkin foydalanish imkoniyati mavjudligi, ayni vaqtda mavjud ortofotoplanlarni yuklash ishlari bajarilayotgani bildirildi.

Hozirda portalda Toshkent, Sirdaryo, Jizzax, Qashqadaryo va Surxondaryo viloyatlari hududidagi 80 dan ortiq shahar va shaharchalarning bosh rejasi, Toshkent, Sirdaryo va Jizzax viloyatlari hududidagi jami 122 ta hududlar arxitekturaviy rejalashtirishni tashkillashtirish loyihalari (APOT) to‘g‘risida ma’lumotlar bor. 2020-yilning oxirigacha butun respublikani qamrab olish va geoportalni to‘liq ishga tushirish rejalashtirilgan.

Geoportal foydalanuvchilari o‘zlarini qiziqtirgan hududning bosh rejasini yoki bosh rejaning tarkibiy qismlarini qatlamlar ko‘rinishida kartografik asos ustiga yuklashi va ularning shaffofligini o‘zgartirgan holda o‘zaro solishtirish yo‘li bilan monitoring yuritishi mumkin.

Eslatib o‘tamiz, “O‘zbekiston Respublikasi davlat shaharsozlik kadastri” geografik axborot tizimi (geoportal) qurilish sohasiga axborot-kommunikatsiya texnologiyalarini keng joriy etish chora-tadbirlari to‘g‘risidagi Prezident qaroriga ko‘ra ishga tushirilishi belgilangan edi.