Toshkentda Abdulla Qodiriy va Labzak ko‘chalari kesishmasidagi ko‘prik yopilgan. Yo‘l o‘tkazgichda ta’mirlash ishlari olib borilmoqda

Toshkent shahar hokimligi Shayxontohur tumanidagi Abdulla Qodiriy hamda Labzak ko‘chalari kesishmasidagi ko‘prikda ta’mirlash ishlari olib borilishini xabar qildi.

Hokimlik xabarida 28-iyun soat 08:00 dan 29-iyun soat 12:00 ga qadar Shayxontohur tumani Abdulla Qodiriy va Labzak ko‘chalari kesishmasidagi ko‘prikda joriy ta’mirlash ishlari olib borilishi, shu munosabat bilan mazkur yo‘l o‘tkazgich avtomobillar harakati uchun vaqtincha yopilishi qayd etilgan.

Avval 25-iyun kun davomida Yunusobod tumanining Iftixor ko‘chasida ta’mirlash ishlari olib borilishi va yo‘l qatnov qismining faqat bitta harakatlanish chizig‘i avtomobillar uchun ochiq bo‘lishi xabar qilingandi. Shuningdek, Mirzo Ulug‘bek tumani hududidagi Do‘rmon yo‘li ko‘chasidagi ikkita ko‘cha bilan kesishma oralig‘idagi yo‘l 19-iyundan 5-iyulga qadar yopilgan.