Ispaniya eng kam yashash daromadi (iste’mol savati) dasturini ishga tushirdi. Unda fuqarolarga pullarni shunchaki tarqatish ko‘zda tutilgan. Bu haqda 26-iyun kuni Euronews xabar berdi.
Birinchi navbatda davlat tomonidan yordam pulini aholining eng zaif qatlamlaridan bo‘lgan 255 ming kishi olishi mumkin. Birinchi yordam pulini oluvchilarning yarmini bolalar tashkil etadi.
Dastur to‘laqonli ishga tushganidan keyin 850 mingta uy xo‘jaligi yoki 2,3 million kishi yordam puli olishi mumkin. Eng kam yashash daromadi uy xo‘jaligiga beriladi. Uning miqdori bir kishi uchun 462 dollarni tashkil etadi. Oila a’zolari soni ortishi bilan, beriladigan pul miqdori ham oshiriladi. Uning eng maksimal miqdori oyiga 1015 yevroni tashkil etadi.
Ta’kidlash joziki, Ispaniya koronavirus tufayli Yevropa Ittifoqi davlatlari orasida eng ko‘p iqtisodiy zarar ko‘rdi. So‘nggi ikki oy ichida 100 mingga yaqin ispan kompaniyalari bankrotligini e’lon qildi.
Eng yomon prognozlarga ko‘ra, mamlakat yalpi ichki mahsuloti 2020-yilda 15 foizga tushib ketishi mumkin.
Jons Hopkins ma’lumotlariga ko‘ra, Ispaniyada koronavirusga chalinganlar soni 247 905 kishiga yetgan, ularning 150 376 nafari sog‘aygan, bemorlarning 28 338 nafari virus qurboni bo‘lgan.
Avvalroq Ispaniyaning Barselona universiteti tadqiqotchilari koronavirus epidemiya boshlanishidan bir yil avval Yevropada paydo bo‘lganini aniqlagani xabar berilgan edi.
Izoh (0)