Испания энг кам яшаш даромади (истеъмол савати) дастурини ишга туширди. Унда фуқароларга пулларни шунчаки тарқатиш кўзда тутилган. Бу ҳақда 26 июнь куни Euronews хабар берди.
Биринчи навбатда давлат томонидан ёрдам пулини аҳолининг энг заиф қатламларидан бўлган 255 минг киши олиши мумкин. Биринчи ёрдам пулини олувчиларнинг ярмини болалар ташкил этади.
Дастур тўлақонли ишга тушганидан кейин 850 мингта уй хўжалиги ёки 2,3 миллион киши ёрдам пули олиши мумкин. Энг кам яшаш даромади уй хўжалигига берилади. Унинг миқдори бир киши учун 462 долларни ташкил этади. Оила аъзолари сони ортиши билан, бериладиган пул миқдори ҳам оширилади. Унинг энг максимал миқдори ойига 1015 еврони ташкил этади.
Таъкидлаш жозики, Испания коронавирус туфайли Европа Иттифоқи давлатлари орасида энг кўп иқтисодий зарар кўрди. Сўнгги икки ой ичида 100 мингга яқин испан компаниялари банкротлигини эълон қилди.
Энг ёмон прогнозларга кўра, мамлакат ялпи ички маҳсулоти 2020 йилда 15 фоизга тушиб кетиши мумкин.
Жонс Ҳопкинс маълумотларига кўра, Испанияда коронавирусга чалинганлар сони 247 905 кишига етган, уларнинг 150 376 нафари соғайган, беморларнинг 28 338 нафари вирус қурбони бўлган.
Аввалроқ Испаниянинг Барселона университети тадқиқотчилари коронавирус эпидемия бошланишидан бир йил аввал Европада пайдо бўлганини аниқлагани хабар берилган эди.
Изоҳ (0)