Ўзбекистон Транспорт вазирлиги ахборот хизмати раҳбари Наврўз Ашурматов 23 июнь, сешанба куни ўтказилган брифингда шаҳар жамоат транспортида юзага келаётган тиқилинчликлар масаласида саволга жавоб берди.
Вазирлик вакилига «Тошкент шаҳрида йўловчилар тиқилинч бўладиган кичик автобусларни йўналишга чиқмаган катта Mercedes-Benz автобусларга алмаштирса бўлмайдими?»мазмунидаги савол берилди.
Наврўз Ашурматовнинг сўзларига кўра, «Тошшаҳартрансхизмат» компанияси таркибига кирувчи автокорхоналар томонидан 131 та йўналишда 1067 та автобус ишга чиқарилган.
«Автобус салонида етарлича йўловчи бўлса, ўз саломатлигини ўйлаган ҳолда унга чиқмаганингиз ҳар жиҳатдан маъқул. Озроқ кутса, кейинги автобусда бемалол кетиш мумкин», — деди вазирлик ахборот хизмати раҳбари.
Ўзбекистонда 8 июндан «сариқ» ва «яшил» ҳудудларда жамоат транспортида ҳаракатланишга рухсат берилди. Тошкентда автобус ҳайдовчилари учун қўйилган кунлик «план» бекор қилинди. Шаҳар бўйлаб транспорт қатновлари автобусларда амалга оширилади, улар пойтахт ичида ҳамда Тошкент вилоятининг «қизил» тоифага кирмаган ҳудудлари йўналишлари бўйича қатнайди.
Республика махсус комиссиясининг хабарига кўра, жамоат транспортида олиб борилган мониторинг натижалари автобус салонида ижтимоий масофани сақлаш билан боғлиқ карантин талабларини бузиб, тирбандлик ҳосил қилган ҳолда йўловчи ташиш ҳолатлари учраётганлигини кўрсатмоқда. Бу эса аҳоли ўртасида коронавирус инфекцияси тарқалишига сабаб бўлиши мумкин бўлган ҳолат сифатида эпидемияларга қарши кураш қоидаларини бузганлик учун жавобгарликка тортишга асос бўлади.
Шу муносабат билан Санитария-эпидемиология назорати давлат инспекцияси ва Транспорт вазирлигига автобус рейсларида тирбандликка йўл қўймаслик ҳамда бошқа санитария-эпидемиология талабларига қатъий риоя этилиши устидан назоратни кучайтириш топширилди.
Аввалроқ «Тошшаҳартрансхизмат» автобуслар ҳаракатининг дастлабки кунларида айрим йўналишларда карантин қоидаларининг қўпол равишда бузилиши ҳолатлари кузатилганини маълум қилганди.
Изоҳ (0)