Respublika ta’lim markaziga yangi rahbar tayinlandi

O‘zbekiston xalq ta’limi vazirining buyrug‘i bilan Shuhrat Sattorov Respublika ta’lim markazi direktori lavozimiga tayinlandi. Bu haqda vazirlik matbuot xizmati xabar qilgan.

Shuhrat Sattorov 2020-yilning fevral oyidan beri mazkur markazda direktor o‘rinbosari lavozimida ishlab kelayotgan edi.

Shuhrat Sattorov 1985-yilda tug‘ilgan. 2008-yilda O‘zbekiston davlat jahon tillari universitetining xalqaro jurnalistika fakultetida, 2008—2009-yillarda Hindistonning Puna universiteti Ommaviy aloqalar va jurnalistika fakultetida tahsil olgan.

2018—2020-yillarda Janubiy Koreyaning Yonsey universitetida Davlat, biznes va tadbirkorlik fakultetida magistratura mutaxassisligini tamomlagan.

Avvalroq 2020-yil 10-iyunda Rustam Karimjonov xalq ta’limi vazirining o‘rinbosari lavozimiga tayinlangani, keyinchalik 14-iyunda Prezident Administratsiyasi ta’lim sho‘basi mudiri Usmon Sharifxo‘jayev O‘zbekiston Respublikasi xalq ta’limi vazirining birinchi o‘rinbosari lavozimini egallagani haqida xabarlar berilgan edi.