Qaysi tumandan, qaysi maktabdan bitiruvchilarning oliy ta’limga kirish ko‘rsatkichi past bo‘lsa, o‘sha tuman va maktab mutasaddilariga nisbatan chora ko‘riladi. Bu haqda xalq ta’limi vaziri Sherzod Shermatov Xalqaro press-klubning Farg‘ona viloyatidagi sayyor sessiyasidagi chiqishida ma’lum qildi.
Xalq ta’limi vazirining so‘zlariga ko‘ra, maktablar faoliyatini ikki qismga bo‘lish mumkin — oliy ta’limga tayyorlov va kasbga yo‘naltirish.
“Birinchi yo‘nalishdagi faoliyat — oliy ta’limga, universitetga tayyorlash. Qaysi tumanda maktab bitiruvchilarining oliy ta’limga kirish darajasi past bo‘lsa, demak, o‘sha tuman boshqarmasi yaxshi ishlamagan, ularga nisbatan chora ko‘riladi. Keyingi yildan boshlab ta’lim boshqarmalari mehnat faoliyati samaradorligini baholashning asosiy yo‘nalishi shu bo‘ladi”, — deydi Shermatov.
Uning aytishicha, Farg‘onaning o‘zida 942 ta maktab bo‘lsa, 100 taga yaqinidan birorta bitiruvchi oliy ta’limga kirmagan. Buning natijasida qator muammolar kelib chiqadi — mahallada oliy ma’lumotli odam bo‘lmaydi, eng oddiy mutaxassislar ham yetishmaydi. “Shu bois bitiruvchilari oliy ta’limga kirmagan maktab direktoriga, shu tuman boshqarmasiga chora ko‘riladi. Bitta ham bitiruvchisi universitetga kira olmasligi mumkin emas. Hech bo‘lmasa, bittasi bo‘lsa ham kirishi kerak”, — deydi u.
Shuningdek, 7-sinfdan boshlab proforiyentatsiya — kasbga yo‘naltirish jarayoni boshlanishi kerakligini ta’kidladi.
“O‘quvchi qaysi yo‘nalishni tanlaydi? Oliy ta’lim bo‘lsa, universitetga tayyorlanadi, o‘ziga qiziq bo‘lgan sohaga kerakli fanlar chuqurlashtirib o‘qitiladigan dastur bilan shug‘ullanadi. Qaysi kasblar borligini ham maktablarda o‘qitmas ekanmiz, o‘quvchilar qaysi kasblar borligini bilmaydi.
Hamma sektor rahbarlariga asosiy vazifa qilib qo‘yildi — o‘quvchi 10-sinfni bitirib, yozgi ta’tilga chiqqanida sektor rahbarlari ularni kimgadir shogirdlikka, qaysidir yo‘nalishga ishga qo‘yadi. Maktabni bitirayotganda kasbga moslashib, pul topishni o‘rganib chiqadi. Biror jinoyatchilikka, noqonuniy harakatga, xorijda qiynalib, kam maoshli ishga ketishiga hojat qolmaydi”, — deb ta’kidlagan Sherzod Shermatov.
Eslatib o‘tamiz, Xalq ta’limi vazirligida 2019-yilning oktabr oyida bo‘lib o‘tgan navbatdagi kengaytirilgan Hay’at yig‘ilishida o‘quvchilari OTMlarga kirishda yomon natija ko‘rsatadigan maktab rahbarlari jazolanishi aytilgan edi.
Izoh (0)