“Yilning 6 oyida dalada bo‘lgach, qanaqa ta’lim sifati haqida gapirish mumkin edi?”. Shermatov o‘qituvchilarning majburiy mehnati haqida

Farg‘ona shahrida 7-iyun kuni bo‘lib o‘tgan Xalqaro press-klub sessiyasida Sherzod Shermatov ham chiqish qilib, oxirgi uch yilda Xalq ta’limi vazirligi sohasida amalga oshirilgan ishlar haqida ma’lumot berdi.

“Mana, o‘qituvchilar bilan gaplashdim — Farg‘ona viloyatida o‘qituvchi uch yil oldin yilning 12 oyidan 6 oyida dalada bo‘lgan. Paxtada bo‘lgan, chopiqda bo‘lgan, boshqa ishlarda... Faraz qiling, o‘qituvchi 6 oy dalada bo‘lsa, ko‘cha supurishda bo‘lsa, tashriflarda birinchi balogardon o‘qituvchi bo‘lsa, qanaqa ta’lim sifati haqida gapirish mumkin?

Toshkentda o‘tirganga uncha sezilmasligi mumkin, lekin aynan agrar viloyatlarda, qishloqlarda o‘qituvchining hayotida juda katta o‘zgarish aynan mana shundan bo‘ldi” – deydi Shermatov.

U o‘qituvchilarning maoshi oshirilgani va vaqtida berilayotganini qayd etdi.

https://www.facebook.com/uzreport.tv/videos/619403842260939/

“Buning natijasida, birgina Farg‘ona viloyatida 2 mingdan ortiq erkak o‘qituvchilar, 10 mingdan oshiq oliy ma’lumotli o‘qituvchilar qaytib keldi. Xabaringiz bor, oliy ma’lumotli bo‘lmagan minglab o‘qituvchilar dars berardi”, – dedi Xalq ta’limi vaziri.

Sherzod Shermatov maktablardagi sharoitlar masalasiga ham to‘xtalib o‘tgan.

“Sharoit deganda biz innovatsiyalar, yuqori texnologiyalar haqida gapirmayapmiz”, – degan vazir maktablarni isitish, ichimlik suvi bilan ta’minlash, devor bilan o‘rash kabi elementar sharoitlarni sanab o‘tdi.

Ma’lum bo‘lishicha, oxirgi uch yilda Farg‘ona viloyatida 129 ta maktabda isitish pechi o‘rnatilgan, 85 ta maktabga ichimlik suvi olib kelingan, 109 ta maktab devor bilan o‘ralgan. Viloyatdagi maktablar soni 27 taga ko‘payib, 100 dan ortiq maktab mukammal ta’mirdan chiqarilgan.

“Lekin qilinadigan ishlar hali juda ko‘p. Albatta, 25-30 yilda qilinmagan ishni 3 yilda qilib bo‘lmaydi”, – deya ta’kidladi Sherzod Shermatov.

Avvalroq Samarqandda maktab o‘qituvchilarini hojatxona ta’mirlashga majburlagan mudir 11 million so‘m jarimaga tortilgani haqiqda xabar berilgandi.