O‘zbekiston Tashqi ishlar vazirligi Turkiya orqali xalqaro yuk tashishni rejalashtirayotgan fuqarolarga murojaat qildi

O‘zbekistonning Anqara shahridagi elchixonasi ma’lumotiga ko‘ra, Turkiya Ichki ishlar vazirligi mamlakat hududida xalqaro yuk tashuvlarini amalga oshirish qoidalariga o‘zgartirish kiritilgan. Bu haqda O‘zbekiston Tashqi ishlar vazirligi xabar berdi.

Xabar berilishicha, xorijlik haydovchilarga iloji boricha tezroq mamlakatdan chiqib ketish sharti bilan 14 kunlik karantin davrini kutmasdan Turkiya hududiga kirishga ruxsat beriladi.

Kema orqali xorijiy yuk tashuvchilarga (Ro-Ro operatsiyalari) Zonguldak—Chernomorsk (Illichivsk), Istanbul—Chernomorsk, Karasuk—Chernomorsk, Konstanta—Karasu, Tashuju—Tripoli va Mersin—Hayfa yo‘nalishlarida tashishni amalga oshiradigan kema bortida bo‘lishga ruxsat beriladi. Bungacha haydovchilarning kemaga kirishiga ruxsat berilmagan, faqat yarim tirkamalar va tirkamalar qabul qilingan.

Ma’lum qilinishicha, koronavirus kasalligi alomatlari aniqlansa, chet ellik haydovchilarning Turkiya hududiga kirishi rad etiladi.

Shu munosabat bilan, O‘zbekiston Tashqi ishlar vazirligi Turkiya hududi orqali xalqaro yuk tashishni rejalashtirayotgan fuqarolarga Turkiya tomonining ushbu qarorini inobatga olishni tavsiya qiladi.

Eslatib o‘tamiz, aprel oyining boshida koronavirus tarqalishini kamaytirish borasida ko‘rilayotgan shoshilinch choralar sababli Turkiya hududiga yuk tashuvchilarining kirishi cheklangani sababli, o‘zbekistonlik yuk tashuvchilar Gruziya—Turkiya chegarasida qolib ketgandi. Turkiya va Gruziyaning mas’ul vazirlik va idoralari bilan olib borilgan muzokaralar natijasida o‘zbekistonlik avtotashuvchilar Turkiya hududiga O‘zbekistondan chiqqan kunlaridan boshlab 14 kunlik muddat tugaganidan keyin kirishiga ruxsat berilgandi.

Bundan tashqari, o‘zbekistonlik 11 nafar haydovchi 7-mart kuni koronavirus tarqalishining oldini olish maqsadida Turkmaniston va Eron o‘rtasidagi chegara yopilishi sababli “Lutfobod” va “Saraxs” chegara nazorat-o‘tkazish punktlarida qolib ketgandi. Ular transport vositalarini bojxona postlarida qoldirib vatanga qaytishni rad etgan va O‘zbekistonga qaytarish masalasida Prezident Shavkat Mirziyoyevdan yordam so‘rab videomurojaat yo‘llagan. Shavkat Mirziyoyev mazkur haydovchilarni O‘zbekistonga qaytarish bo‘yicha alohida ko‘rsatma berdi. Keyinchalik mazkur haydovchilar Erondagi O‘zbekiston fuqarolari bilan birga charter reysda Namanganga olib kelinib, karantinga joylashtirilgan. 31-mart kuni ana shu karantin muddati tugagan va ular o‘z uylariga kuzatilgandi.