Ўзбекистон Ташқи ишлар вазирлиги Туркия орқали халқаро юк ташишни режалаштираётган фуқароларга мурожаат қилди

Ўзбекистоннинг Анқара шаҳридаги элчихонаси маълумотига кўра, Туркия Ички ишлар вазирлиги мамлакат ҳудудида халқаро юк ташувларини амалга ошириш қоидаларига ўзгартириш киритилган. Бу ҳақда Ўзбекистон Ташқи ишлар вазирлиги хабар берди.

Хабар берилишича, хорижлик ҳайдовчиларга иложи борича тезроқ мамлакатдан чиқиб кетиш шарти билан 14 кунлик карантин даврини кутмасдан Туркия ҳудудига киришга рухсат берилади.

Кема орқали хорижий юк ташувчиларга (Ro-Rо операциялари) Зонгулдак—Черноморск (Илличивск), Истанбул—Черноморск, Карасук—Черноморск, Константа—Карасу, Ташужу—Триполи ва Мерсин—Ҳайфа йўналишларида ташишни амалга оширадиган кема бортида бўлишга рухсат берилади. Бунгача ҳайдовчиларнинг кемага киришига рухсат берилмаган, фақат ярим тиркамалар ва тиркамалар қабул қилинган.

Маълум қилинишича, коронавирус касаллиги аломатлари аниқланса, чет эллик ҳайдовчиларнинг Туркия ҳудудига кириши рад этилади.

Шу муносабат билан, Ўзбекистон Ташқи ишлар вазирлиги Туркия ҳудуди орқали халқаро юк ташишни режалаштираётган фуқароларга Туркия томонининг ушбу қарорини инобатга олишни тавсия қилади.

Эслатиб ўтамиз, апрель ойининг бошида коронавирус тарқалишини камайтириш борасида кўрилаётган шошилинч чоралар сабабли Туркия ҳудудига юк ташувчиларининг кириши чеклангани сабабли, ўзбекистонлик юк ташувчилар Грузия—Туркия чегарасида қолиб кетганди. Туркия ва Грузиянинг масъул вазирлик ва идоралари билан олиб борилган музокаралар натижасида ўзбекистонлик автоташувчилар Туркия ҳудудига Ўзбекистондан чиққан кунларидан бошлаб 14 кунлик муддат тугаганидан кейин киришига рухсат берилганди.

Бундан ташқари, ўзбекистонлик 11 нафар ҳайдовчи 7 март куни коронавирус тарқалишининг олдини олиш мақсадида Туркманистон ва Эрон ўртасидаги чегара ёпилиши сабабли «Лутфобод» ва «Сарахс» чегара назорат-ўтказиш пунктларида қолиб кетганди. Улар транспорт воситаларини божхона постларида қолдириб ватанга қайтишни рад этган ва Ўзбекистонга қайтариш масаласида Президент Шавкат Мирзиёевдан ёрдам сўраб видеомурожаат йўллаган. Шавкат Мирзиёев мазкур ҳайдовчиларни Ўзбекистонга қайтариш бўйича алоҳида кўрсатма берди. Кейинчалик мазкур ҳайдовчилар Эрондаги Ўзбекистон фуқаролари билан бирга чартер рейсда Наманганга олиб келиниб, карантинга жойлаштирилган. 31 март куни ана шу карантин муддати тугаган ва улар ўз уйларига кузатилганди.