Madridning “Real” klubi 33 yoshli darvozabon Tibo Kurtua bilan yangi shartnoma bo‘yicha kelishuvga erishdi. Bu haqda jurnalist Sasha Tavolyeri o‘zining X (sobiq Twitter) sahifasida xabar berdi.
Manbaga ko‘ra, tomonlar ikki yillik yangi bitim borasida og‘zaki kelishuvga erishgan. Hozirda Kurtuaning “qirollik klubi” bilan amaldagi shartnomasi 2026-yil yoziga qadar mo‘ljallangan. Agar yangi kelishuv rasman tasdiqlansa, belgiyalik posbon 2027/28-yilgi mavsum yakunigacha “Real Madrid” safida harakat qilishda davom etadi.
Avvalroq ommaviy axborot vositalarida “Real” Parijning “PSJ” klubi darvozaboni Janluiji Donnarummaga qiziqayotgani haqida xabarlar chiqqan edi. Biroq Kurtua bilan kelishuvga erishilgach, madridliklar italiyalik darvozabon transferidan voz kechgan.
Tibo Kurtua 2018-yil yozida “Chelsi”dan 35 million yevro evaziga “Real” safiga qo‘shilgan edi. U o‘tgan davr mobaynida klub safida 289 ta o‘yinda maydonga tushib, 282 ta gol o‘tkazib yuborgan va 114 ta uchrashuvda darvozasi dahlsizligini saqlab qolgan.
Transfermarkt portali ma’lumotiga ko‘ra, hozirda belgiyalik darvozabonning transfer qiymati 20 million yevroga teng.
Izoh (0)