Boysun tumani hokimligi 2020-yilning 12-may kuni internetda “Boysun tumani hokimi eski bozorni buzdirib, savdogarlarni yangi bozorga o‘tkazmoqchi” mazmunida tarqalgan videoga rasmiy munosabat bildirdi.
Unga ko‘ra, Boysun tumanining “Mustaqillik” mahallasi hududidan dehqon (oziq-ovqat) bozori uchun 1,67 gektar yer maydoni ajratilib, bu yerda zamonaviy talablarga muvofiq savdo xizmati ko‘rsatish uchun barcha sharoitlarga ega savdo majmuasi qurib bitkazilgan.
Shu sababli “Tuzbozor” mahallasi hududida joylashgan eski dehqon bozorida savdo-sotiq qilib kelayotgan sotuvchilarga o‘z faoliyatlarini ushbu yangi bozorda davom ettirish to‘g‘risida ogohlantirib kelinmoqda.
Ammo videomaterialda vaziyat noto‘g‘ri talqin qilingan, ya’ni eski bozorga kiraverishdagi chorrahada turgan ekskavator bozorni buzish uchun emas, balki “O‘zbektelekom” AK viloyat filiali Boysun telekommunikatsiya bog‘lamasi tomonidan Alisher Navoiy nomli hamda Istiqlol ko‘chalari bo‘ylab xalqaro optik tolali aloqa kabelini yotqizish maqsadida bu ko‘chada qazish ishlarini bajarish uchun jalb qilingan. Qolaversa, ushbu ko‘chalarda transport qatnovining vaqtincha cheklanishi bu yerda ishlayotgan ishchi-xodimlarning faoliyat xavfsizligini ta’minlash uchun qilingan.
Ushbu holat fuqarolarda tushunmovchilikni keltirib chiqarganligi sababli tuman hokimligi va soha xodimlari bu yerda bo‘lib, vaziyatni ularga to‘g‘ri tushuntirgan. Hozirda mazkur anglashilmovchilik bilan bog‘liq muammo yo‘q. Bu ko‘chalarda xalqaro optik tolali aloqa kabelini yotqizish ishlari o‘rnatilgan tartibda davom ettiriladi.
Avvalroq Telegram’da Boysun bozoridagi tadbirkorlar yangi qurilgan bozorga ko‘chib o‘tishga qarshi chiqib norozilik bildirayotgani, eski bozorning “snos”ga tushgani haqida videolar tarqalgandi.
Izoh (0)