Бойсун тумани ҳокимлиги 2020 йилнинг 12 май куни интернетда «Бойсун тумани ҳокими эски бозорни буздириб, савдогарларни янги бозорга ўтказмоқчи» мазмунида тарқалган видеога расмий муносабат билдирди.
Унга кўра, Бойсун туманининг «Мустақиллик» маҳалласи ҳудудидан деҳқон (озиқ-овқат) бозори учун 1,67 гектар ер майдони ажратилиб, бу ерда замонавий талабларга мувофиқ савдо хизмати кўрсатиш учун барча шароитларга эга савдо мажмуаси қуриб битказилган.
Шу сабабли «Тузбозор» маҳалласи ҳудудида жойлашган эски деҳқон бозорида савдо-сотиқ қилиб келаётган сотувчиларга ўз фаолиятларини ушбу янги бозорда давом эттириш тўғрисида огоҳлантириб келинмоқда.
Аммо видеоматериалда вазият нотўғри талқин қилинган, яъни эски бозорга кираверишдаги чорраҳада турган экскаватор бозорни бузиш учун эмас, балки «Ўзбектелеком» АК вилоят филиали Бойсун телекоммуникация боғламаси томонидан Алишер Навоий номли ҳамда Истиқлол кўчалари бўйлаб халқаро оптик толали алоқа кабелини ётқизиш мақсадида бу кўчада қазиш ишларини бажариш учун жалб қилинган. Қолаверса, ушбу кўчаларда транспорт қатновининг вақтинча чекланиши бу ерда ишлаётган ишчи-ходимларнинг фаолият хавфсизлигини таъминлаш учун қилинган.
Ушбу ҳолат фуқароларда тушунмовчиликни келтириб чиқарганлиги сабабли туман ҳокимлиги ва соҳа ходимлари бу ерда бўлиб, вазиятни уларга тўғри тушунтирган. Ҳозирда мазкур англашилмовчилик билан боғлиқ муаммо йўқ. Бу кўчаларда халқаро оптик толали алоқа кабелини ётқизиш ишлари ўрнатилган тартибда давом эттирилади.
Аввалроқ Telegram’да Бойсун бозоридаги тадбиркорлар янги қурилган бозорга кўчиб ўтишга қарши чиқиб норозилик билдираётгани, эски бозорнинг «снос»га тушгани ҳақида видеолар тарқалганди.
Изоҳ (0)