Jizzax viloyatida yuzlab tut daraxtlarini noqonuniy kesgan ikki fermerga nisbatan jinoiy ish qo‘zg‘atildi. Bu haqda viloyat IIB matbuot xizmati xabar berdi.
Ma’lum bo‘lishicha, viloyatning Zarbdor tumanidagi “Zafarbek Javlonbek dalasi” fermer xo‘jaligi raisi, 1993-yilda tug‘ilgan F.M. kasallandi, deb o‘z xo‘jaligidagi 402 tup tutni nobud qilgan.
Tuman ekologiya bo‘limi ma’lumotlariga ko‘ra, nobud qilingan daraxtlarning 260 tupi hech qanday kasallikka chalinmagan. Mutaxassislarning bildirishicha, o‘simlik dunyosiga 106 million 415 ming 600 so‘mlik zarar yetkazilgan.
Shuningdek, tumandagi “Ruslan Nodirbek dalasi” fermer xo‘jaligi raisi, 1995-yilda tug‘ilgan R.Y. ham 680 tup tutni noqonuniy kesgan. Ushbu daraxtlarning 416 tupi kasallanmaganligi aniqlangan. Fermer yetkazgan zarar miqdori 149 million 856 ming 600 so‘mni tashkil qilgan.
Qayd etilishicha, holatlar yuzasidan tegishli tartibda jinoyat ishlari qo‘zg‘atilgan.
Eslatib o‘tamiz, O‘zbekistonda 2020-yilning may oyi “Brakonyerlikka qarshi kurash oyi” deb e’lon qilindi. Bu oy davomida Davlat ekologiya qo‘mitasi tizimidagi inspektorlar respublikaning barcha hududlari bo‘ylab, noqonuniy ov va baliq ovlash bilan shug‘ullanadigan qonunbuzarlarga, shuningdek, o‘simlik dunyosidan noqonuniy foydalanadigan, daraxt va butalarni ruxsatsiz kesadigan huquqbuzarlarga qarshi keskin kurash olib boradi.
Izoh (0)