Tojikiston prezidenti Emomali Rahmonning davolanish uchun Germaniyaga ketgani haqidagi xabarlar rad etildi. Tojikiston prezidentining maslahatchisi Abdujabbor Rahmonzodaning ma’lum qilishicha, bu xabarlar haqiqatga to‘g‘ri kelmaydi. Bu haqda “Interfaks” xabar berdi.
Tojikiston Sog‘liqni saqlash vazirligi 30-aprel kuni mamlakatda koronavirusga chalinish bo‘yicha dastlabki holatlar qayd etilganini tasdiqlagan. 4-may kuni esa Tojikistonning rasmiy OAVlari mamlakatda 230 kishi koronavirusga chalingani va uch kishi mazkur kasallikdan vafot etgani haqida xabar bergan.
Rahmonzodaning ma’lum qilishicha, koronavirusga qarshi kurashish va uning ustidan g‘alaba qozonish uchun hukumat atrofida birlashish kerak bo‘lgan bir vaqtda, tojik muxolifati vakili Sharofiddin Gadoyev xorijdan turib Tojikiston prezidentining betob ekanligi va Germaniyaga jo‘natilgani haqida yolg‘on xabar tarqatmoqda.
Prezident maslahatchisining bildirishicha, Emomali Rahmon ayni paytda o‘z ish joyida.
Ma’lum qilinishicha, Sharofiddin Gadoyevning xabarida ta’kidlangan Phoenix Air kompaniyasining Gulfstream G-III samolyoti Dushanbega Tojikiston hukumatining ruxsati bilan 3-may kuni Germaniyadan insonparvarlik yordamini olib kelgan.
Ma’lumot uchun, O‘zbekiston Prezidenti Shavkat Mirziyoyev 5-may kuni Tojikiston prezidenti Emomali Rahmon bilan telefon orqali muloqot qilgan. Muloqot chog‘ida davlat rahbarlari koronavirusga qarshi kurash masalasi hamda Sardobada yuz bergan falokatni muhokama qilgan.
Izoh (0)