O‘zbekistonda 2-may soat 23:00 holatiga ko‘ra koronavirus infeksiyasini yuqtirib olganlar soni 5 kishiga ko‘payib, 2118 nafarga yetdi. Sog‘liqni saqlash vazirligi ma’lumotlariga ko‘ra, 2-may davomida jami 32 kishida koronavirus infeksiyasi aniqlangan.
Kasallik eng ko‘p qayd etilgan Toshkent shahri (639 ta holat) va Buxoro viloyatida (428) 2-may kuni kasallanish bilan bog‘liq yangi holatlar qayd etilmadi.
O‘zbekistonda koronavirus bilan kasallanganlar soni 100 nafardan oshgan hududlar 8 taga yetdi. 2-may kuni Samarqandda 12 kishida koronavirus aniqlanib, viloyatdagi umumiy kasallanganlar soni 105 nafarga yetdi.
Ayni vaqtda, 2-may davomida Namangan viloyatida 17 nafar, Qoraqalpog‘istonda sakkiz nafar, Xorazm viloyatida uch nafar, Andijon viloyatida ikki nafar, Toshkent shahrida 29 nafar — jami 59 nafar bemor koronavirusdan sog‘ayib, reabilitatsiyaga kuzatildi.
Jami sog‘ayganlar soni 1271 nafarga yetib, 2-may yakunlariga ko‘ra jami qayd etilgan kasallanish holatlarida sog‘ayganlar ulushi 60 foizni tashkil etdi.
Jizzax va Qashqadaryo viloyatlarida barcha bemorlar sog‘aygan bo‘lsa, undan keyingi eng yaxshi ko‘rsatkich (76 foiz) Buxoro viloyatida bo‘lib turibdi.
Joriy haftada kasallanish holatlari va sog‘ayganlar soni quyidagi o‘zgarib turdi:
- 27-aprel, dushanba — 35 kishi kasallandi, 103 kishi sog‘aydi;
- 28-aprel, seshanba — 35 kishi kasallandi, 100 kishi sog‘aydi;
- 29-aprel, chorshanba — 63 kishi kasallandi, 104 kishi sog‘aydi;
- 30-aprel, payshanba — 37 kishi kasallandi, 37 kishi sog‘aydi;
- 1-may, juma — 47 kishi kasallandi, 79 kishi sog‘aydi;
- 2-may, shanba — 32 kishi kasallandi, 59 kishi sog‘aydi.
Ma’lumot uchun, O‘zbekistonda 15-martdan buyon koronavirusga chalingan bemorlarning to‘qqiz nafari vafot etgan.
Izoh (0)