Volkswagen kompaniyasi yangi to‘liq o‘lchamli elektrokrossoverlar ishlab chiqarishni boshladi. SAIC Volkswagen zavodi ishchilarining Lounge SUVe shartli nom ostidagi ilk elektrokar kuzovi yonida tushgan suratini xitoylik jurnalistlar e’lon qildi. Taxminlarga ko‘ra, korxona 2019-yilgi ID. Roomzz konseptini seriyali ishlab chiqarishni boshlagan, deb xabar beradi Motor.
Volkswagen firmasi ID. Roomzz konseptini yaratishda bir qator jiddiy qarorlarni qabul qilgan bo‘lib, bu seriyali modellarga nasib qilavermaydi — markaziy tirgaksiz ochiluvchi eshiklar, harakat rejimini belgilovchi sensorli pult.
Konveyer versiyasining interyeri qaytadan loyihalangan bo‘lib, 4,9 metrli elektrokrossover saloniga ikki yoki uch qator o‘rindiq o‘rnatilishi mumkin. Tashqi ko‘rinishi esa tubdan o‘zgarmagan: kuzovdagi silliq chizgilar aerodinamika foydasiga xizmat qiladi, top-versiyalar uchun esa IQ.Light Matrix LED matritsali faralar o‘rnatilishi mumkin.
Roomzz taqdim etilganida unga 306 ot kuchiga ega ikkitalik motor tizimi hamda 82 kilovatt/soatga teng batareya o‘rnatilgani ma’lum qilingandi. Ishlab chiqaruvchilarning hisob-kitobiga ko‘ra, mashina 100 km/soat tezlikka 6,6 soniyada erishadi. Bir marta quvvatlanish orqali 450 kilometr masofa bosishi mumkin.
Izoh (0)