Volkswagen компанияси янги тўлиқ ўлчамли электрокроссоверлар ишлаб чиқаришни бошлади. SAIC Volkswagen заводи ишчиларининг Lounge SUVe шартли ном остидаги илк электрокар кузови ёнида тушган суратини хитойлик журналистлар эълон қилди. Тахминларга кўра, корхона 2019 йилги ID. Roomzz концептини серияли ишлаб чиқаришни бошлаган, деб хабар беради Motor.
SAIC Volkswagen конвейрида тантанали равишда ишлаб чиқариш бошлангани тасвирланган сурат ракурси тўғри бўлмаса-да, автомобилнинг ўлчамларини фарқлаш мумкин — бу катта кроссовер. Модель электормоторга эга эканлигига Lounge SUVe лойиҳасининг номи шама қилади, шу сабабли немис-хитой ҳамкорликда ID. Roomzz прототипини серияли ишлаб чиқаришга тайёрланаётганини тахмин қилиш мумкин. Жадвал ҳам мос келади: 2019 йилги Шанхай автосалонидан олдин ID. Roomzz’ни 2021 йилдан сотувга чиқариш режалаштирилган эди.
Volkswagen фирмаси ID. Roomzz концептини яратишда бир қатор жиддий қарорларни қабул қилган бўлиб, бу серияли моделларга насиб қилавермайди — марказий тиргаксиз очилувчи эшиклар, ҳаракат режимини белгиловчи сенсорли пульт.
Конвейер версиясининг интерьери қайтадан лойиҳаланган бўлиб, 4,9 метрли электрокроссовер салонига икки ёки уч қатор ўриндиқ ўрнатилиши мумкин. Ташқи кўриниши эса тубдан ўзгармаган: кузовдаги силлиқ чизгилар аэродинамика фойдасига хизмат қилади, топ-версиялар учун эса IQ.Light Matrix LED матрицали фаралар ўрнатилиши мумкин.
Roomzz тақдим этилганида унга 306 от кучига эга иккиталик мотор тизими ҳамда 82 киловатт/соатга тенг батарея ўрнатилгани маълум қилинганди. Ишлаб чиқарувчиларнинг ҳисоб-китобига кўра, машина 100 км/соат тезликка 6,6 сонияда эришади. Бир марта қувватланиш орқали 450 километр масофа босиши мумкин.
Изоҳ (0)