Afg‘oniston prezidenti Ashraf G‘ani saroyida ishlovchi xodimlarning kamida 20 nafari koronavirusga chalindi. Bu haqda mamlakat Sog‘liqni saqlash vazirligidagi yuqori lavozimli mansabdor manbasiga tayanib, “RG.ru” xabar berdi.
Ta’kidlanishicha, koronavirus tarqalishiga saroyga hukumatning boshqa bir idorasidan keltirilgan zararlangan hujjat sabab bo‘lgan.
“Ba’zi xodimlar test natijalari hali olinmaganda ham, prezident ma’muriyati binosida ishlashda davom etgan va shu sababli ularni hamda oila a’zolarini izolyatsiyalashga to‘g‘ri keldi. Taxminimizcha, kasallanganlar soni ko‘proq bo‘lishi mumkin”, — deya qo‘shimcha qilgan amaldor.
Ashraf G‘anining rasmiy vakili Sodiq Sodiqiyning ta’kidlashicha, Afg‘onistonning fuqarolik xizmati bo‘yicha komissiyasi davlat xizmatchilariga uyda qolishga ko‘rsatma bergan va mamlakatda avval kiritilgan cheklovlar yana 3 haftaga — may oyi o‘rtasigacha uzaytirilgan.
Ma’lumotlarga ko‘ra, 70 yoshli Ashraf G‘ani o‘z xodimlari bilan aloqani cheklashga va ularning katta qismi bilan raqamli aloqa vositalari orqali muloqot qilishga qaror qilgan. Ma’lum qilinishicha, sog‘lig‘ida ba’zi muammolari bor G‘ani aksariyat uchrashuvlarni videoanjuman shaklida o‘tkazmoqda va o‘z atrofidagi sanoqli odamlar bilan shaxsan uchrashmoqda.
Mavzuga doir: “Tolibon” harakati koronavirusga qarshi kurash bo‘yicha Afg‘onistonda targ‘ibot ishlarini olib bormoqda
Izoh (0)